തിരുവനന്തപുരം: ദേശീയ ബാലാവകാശ കമ്മിഷൻ ഏർപ്പെടുത്തിയ മികച്ച പെർഫോമിംഗ് ഡിസ്ട്രിക്‌ട് അവാർഡ് തിരുവനന്തപുരം ജില്ലയ്‌ക്ക് ലഭിച്ചു. കുട്ടികൾക്കിടയിലെ ലഹരിവസ്‌തുക്കളുടെ ഉപയോഗം, കുട്ടികളെ കടത്തുന്നത്, കുട്ടികൾക്കെതിരെയുള്ള അതിക്രമങ്ങൾ എന്നിവ തടയുന്നതിൽ സ്വീകരിച്ച നടപടികൾ കണക്കിലെടുത്താണ് അവാർഡ്. ദേശീയ ബാലാവകാശ കമ്മിഷനും നാർകോട്ടിക്‌സ് കൺട്രോൾ ബ്യൂറോയും സംയുക്തമായി തയ്യാറാക്കിയ ആക്ഷൻ പ്ലാൻ ജില്ലയിൽ വിജയകരമായി നടപ്പിലാക്കാൻ കഴിഞ്ഞുവെന്ന് കമ്മിഷൻ ചൂണ്ടിക്കാട്ടി.
2021 ജൂലായ് ഡിസംബർ വരെയുള്ള പ്രവർത്തനങ്ങൾ പരിശോധിച്ച് ഇന്ത്യയിലെ 20 ജില്ലകൾക്ക് മികച്ച പെർഫോമിംഗ് ഡിസ്ട്രിക്‌ട് അവാർഡുകൾ ലഭിച്ചു. ജില്ലാ ഭരണകൂടവും എക്‌സൈസ്, പൊലീസ് തുടങ്ങിയ വകുപ്പുകളും സംയുക്തമായി നടത്തിയ പരിശോധനയാണ് ഇത്തരമൊരു നേട്ടമുണ്ടാക്കാൻ സഹായിച്ചതെന്ന് ജില്ലാ കളക്‌ടർ ഡോ. നവ്ജ്യോത്‌ഖോസ പറഞ്ഞു.