തിരുവനന്തപുരം: സംസ്ഥാനത്തിന്റെ വിദ്യാഭ്യാസ പരോഗതി നേരിട്ടുകണ്ട് വിലയിരുത്താൻ ഡൽഹി സർക്കാർ അയച്ച 32 അംഗസംഘം കേരളത്തിലെത്തി. അദ്ധ്യാപകരും എസ്.സി.ഇ.ആർ.ടി പ്രതിനിധികളും അടങ്ങുന്ന സംഘം മൂന്നു ദിവസത്തെ സന്ദർശനത്തിനായാണെത്തിയത്. വിദ്യാഭ്യാസ കാര്യത്തിൽ ഡൽഹി സർക്കാരുമായി സഹകരിച്ച് പ്രവർത്തിക്കുന്നതിൽ സന്തോഷമാണുള്ളതെന്ന് സംഘവുമായി നടത്തിയ ചർച്ചയിൽ മന്ത്രി വി. ശിവൻകുട്ടി പറഞ്ഞു. കൊവിഡ് കാലത്ത് ഡിജിറ്റൽ ഓൺലൈൻ വിദ്യാഭ്യാസവും പൊതുപരീക്ഷകളും വിജയകരമായി നടത്തിയതിനെ കുറിച്ച് സംഘം മന്ത്രിയോട് ചോദിച്ചറിഞ്ഞു. കുട്ടികൾക്ക് പഠനോപകരണങ്ങൾ ലഭ്യമാക്കിയതിനെ കുറിച്ചും ഉച്ചഭക്ഷണ പദ്ധതിയുടെ വിശദവിവരങ്ങളും സംഘം തേടി. സംസ്ഥാന എസ്.സി.ഇ.ആർ.ടി ഡയറക്ടർ ഡോ. ആർ.കെ. ജയപ്രകാശ് ഉൾപ്പെടെയുള്ളവരുമായും സംഘം ചർച്ച നടത്തി.