ആര്യനാട്: ഉത്പാദന - ആരോഗ്യ - കുടിവെള്ള മേഖലകൾക്ക് പ്രാമുഖ്യം നൽകി 27.87കോടിരൂപ വരവും 27.67കോടി രൂപ ചെലവും 19.73 ലക്ഷം രൂപ മിച്ചവുമുള്ള ഡിജിറ്റൽ ബഡ്ജറ്റ് ആര്യനാട് ഗ്രാമപഞ്ചായത്ത് വൈസ് പ്രസിഡന്റ് എ.ഷീജ അവതരിപ്പിച്ചു.

കാർഷികം, മൃഗസംരക്ഷണം, കൃഷി എന്നിവയുൾപ്പെടെയുള്ള ഉത്പാദന മേഖലയ്ക്ക് 1.38 കോടി രൂപയും വിദ്യാഭ്യാസം - കലാ - സാംസ്കാരിക - യുവജന ക്ഷേമത്തിന് 75ലക്ഷം രൂപയും, ആരോഗ്യ കുടിവെള്ള ശുചിത്വ മേഖലയ്ക്ക് 82 ലക്ഷവും ഭവന നിർമ്മാണത്തിന് ഒരു കോടി രൂപയും പട്ടിക ജാതി പട്ടിക വർഗ വികസനത്തിന് 55 ലക്ഷം രൂപയും തൊഴിലുറപ്പിന് 12കോടിയും പഞ്ചായത്ത് ഓഫീസിലെ പുതിയ കെട്ടിടത്തിന് 42 ലക്ഷവും പൊതു ശ്മശാനത്തിന് 33 ലക്ഷവും,ഘടക സ്ഥാപനങ്ങളുടെ നവീകരണത്തിന് ഒൻപത് ലക്ഷവും,ബയോ കംപോസ്റ്റ് യൂണിറ്റിന് നാല് ലക്ഷവും, പൊതു കിണർ മെയിന്റനൻസിന് 8 ലക്ഷവും, പുതിയ കുഴൽ കിണറിന് 10 ലക്ഷവും,പൊതു കിണർ നിർമ്മാണത്തിന് പത്ത് ലക്ഷവും,അതി ദരിദ്രരുടെ ക്ഷേമത്തിന് രണ്ട് ലക്ഷവും വാർഡുകളിലെ റോഡുകളിലെ നിർമ്മാണത്തിനും മെയിന്റനൻസിനും3.40 കോടി രൂപയും സൗരോർജ പാനൽ സ്ഥാപിക്കുന്നതിന് പത്ത് ലക്ഷവും,തൊഴിലുറപ്പ് വഴി സാമ്പത്തിക വർഷത്തിൽ മണ്ണ്-ജല സംരക്ഷണത്തിന് എട്ട് കോടി രൂപയും ചിലവഴിക്കും.

ഗ്രാമപഞ്ചായത്ത് പ്രസിഡന്റ് ആമുഖപ്രഭാഷണം നടത്തി. ജില്ലാ പഞ്ചായത്തംഗം എ.മിനി, വികസനകാര്യ സ്റ്റാൻഡിംഗ് കമ്മിറ്റി ചെയർമാൻ എം.എൽ.കിഷോർ, ബ്ലോക്ക് പഞ്ചായത്തംഗങ്ങളായ കെ.ഹരി സുധൻ, പറണ്ടോട് ഷാജി, സ്റ്റാൻഡിംഗ് കമ്മിറ്റി ചെയർമാന്മാർ, ഗ്രാമപഞ്ചായത്ത് സെക്രട്ടറി മേബിൾ ഷീല തുടങ്ങിയവർ പങ്കെടുത്തു.