പുൽപ്പള്ളി: വിവാഹ വാഗ്ദാനം നൽകി പെൺകുട്ടിയുടെ നഗ്ന ചിത്രം ആവശ്യപ്പെടുകയും, പിന്നീട് ചിത്രം സമൂഹ മാദ്ധ്യമങ്ങളിൽ പ്രചരിപ്പിക്കുകയും ചെയ്ത കേസിൽ പ്രതിയെ പുൽപ്പള്ളി പൊലീസ് അറസ്റ്റ് ചെയ്തു. മാനന്തവാടി പായോട് തൃപ്പൈക്കുളം വീട്ടിൽ ടി.വി.സനൂപ് (26) നെയാണ് അറസ്റ്റ് ചെയ്തത്.

രണ്ട് വർഷം മുമ്പാണ് പുൽപ്പള്ളി പൊലീസ് സ്റ്റേഷൻ പരിധിയിലുള്ള 23 വയസ്സുള്ള പെൺകുട്ടിയും, സനൂപും പ്രണയത്തിലായത്. വിവാഹം കഴിക്കാമെന്ന് വാഗ്ദാനം നൽകി പെൺകുട്ടിയോട് സനൂപ് നഗ്ന ചിത്രങ്ങൾ ആവശ്യപ്പെടുകയായിരുന്നു. പെൺകുട്ടിക്ക് മറ്റൊരു വിവാഹാലോചന വന്നതോടെ സനൂപ് ചിത്രങ്ങൾ സമൂഹ മാദ്ധ്യമങ്ങളിൽ പ്രചരിപ്പിച്ചു.

പൊലീസ് ഇൻസ്‌പെക്ടർ എ.അനന്തകൃഷ്ണൻ, എസ്‌ഐ കെ.എസ്.ജിതേഷ്, എസ്.സി.പി.ഒ വി.ആർ.ദിലീപ് കുമാർ, സിപിഒ പി.ഹാരിസ്, ആഷ്‌ലിൻ തോമസ് എന്നിവരുടെ നേതൃത്വത്തിലാണ് പ്രതിയെ അറസ്റ്റ് ചെയ്തത്. യുവതിയുടെ പരാതിയുടെ അടിസ്ഥാനത്തിൽ ഐടി ആക്ട് പ്രകാരവും, മറ്റ് വിവിധ വകുപ്പുകൾ പ്രകാരവുമാണ് കേസെടുത്തിട്ടുള്ളത്. പ്രതിയെ കോടതിയിൽ ഹാജരാക്കി.