മാന്നാർ: കവിതകളും കഥകളുമായി നോട്ടുബുക്കിന്റെ താളുകളിൽ കുത്തിക്കുറിച്ചിരുന്ന കുഞ്ഞുമനസിലെ ചിന്തകൾ കവിതകളായി 'ചിത്രശലഭങ്ങൾ' എന്ന പേരിൽ പുസ്തകമാക്കിയിരിക്കുകയാണ് പരുമല സെമിനാരി എൽ.പി സ്കുളിലെ അഞ്ചാം ക്ലാസ് വിദ്യാർത്ഥിനിയായ അദിതി.എം. അദിതി തന്റെ കവിതാ സമാഹാരം സമർപ്പിച്ചിരിക്കുന്നത് പ്രിയപ്പെട്ട ഗുരുനാഥർമാർക്കാണ്. പതിനേഴോളം കുഞ്ഞു കവിതകളുടെ സമാഹാരമാണ് ചിത്രശലഭങ്ങൾ. പരുമല സെമിനാരി സ്കൂളിന്റെ വാർഷികാഘോഷ ചടങ്ങിൽ തിരുവല്ല എ.ഇ.ഒ വി.കെ മിനി കുമാരിയാണ് കവിതാ സമാഹാരത്തിൻ്ന്റെ പ്രകാശനകർമ്മം നിർവ്വഹിച്ചത്.മാന്നാർ ടൗണിൽ ഗ്രാഫിക് ഡിസൈനിംഗും ഡി.റ്റി.പി ജോലികളും ചെയ്ത് കൊടുക്കുന്ന ബ്ളൂഫോക്സ് സ്ഥാപന ഉടമ പരുമല ആനന്ദ് വീട്ടിൽ പ്രദീപ് കുമാറിന്റെയും മാലിനിയുടെയും മകളാണ് അദിതി. മാന്നാർ നായർ സമാജം സ്കൂളിൽ എട്ടാംക്ലാസിൽ പഠിക്കുന്ന ആനന്ദ് കൃഷ്ണ സഹോദരനാണ്. ലളിതഗാനം, കവിതാ രചന, ദേശീയഗാനം തുടങ്ങിയ കലാമത്സരങ്ങളിൽ നിരവധി സമ്മാനങ്ങൾ നേടിയിട്ടുള്ള ഈ കൊച്ചു മിടുക്കി എൽ.എസ്.എസ് സ്കോളർഷിപ്പ് പരീക്ഷയിൽ ഉന്നത വിജയം കരസ്ഥമാക്കി പഠനത്തിലും മുന്നിലാണ്. അറിയപ്പെടുന്ന ഒരു കവയിത്രിയായി അദിതി മാറുമെന്നതിൽ സംശയമില്ലെന്നാണ് സംസ്ഥാന അദ്ധ്യാപക അവാർഡ് ജേതാവും സെമിനാരി സ്കൂൾ പ്രഥമാദ്ധ്യായാപകനുമായ അലക്സാണ്ടർ പി.ജോർജിന് പറയുവാനുള്ളത്.