തുറവൂർ:തുറവൂർ മഹാക്ഷേത്രത്തിലെ പ്രസിദ്ധമായ വിഷുക്കണി ദർശനവും മേൽശാന്തി സ്ഥാനാരോഹണവും വിഷുദിനമായ ഇന്ന് നടക്കും. പുലർച്ചെ മൂന്നിന് നിലവിലെ മേൽശാന്തി നരസിംഹ കടമന്നായ, നൃസിംഹമൂർത്തിയുടേയും മഹാസുദർശനമൂർത്തിയുടേയും ശ്രീലകത്ത് വിഷു കണിയൊരുക്കി പൂജകൾ പൂർത്തിയാക്കി പടിയിറങ്ങും. തുടർന്ന് ക്ഷേത്രം ഊരാളൻ വളമംഗലം. തേവലപ്പൊഴിമന ശങ്കരൻ നമ്പൂതിരി നിയുക്ത മേൽശാന്തി മധുസൂദനൻ അടുക്കത്തായർക്ക് നമസ്ക്കാര മണ്ഡപത്തിൽ വച്ച് പാറ ജപിച്ചു നൽകും. തുടർന്ന് ക്ഷേത്രം തന്ത്രി പുതുമന വാസുദേവൻ നമ്പൂതിരി നിയുക്ത മേൽശാന്തിയെ ശ്രീലകത്തേയ്ക്ക് ആനയിച്ച് മേൽശാന്തിയായി അവരോധിയ്ക്കും.പുറപ്പെടാശാന്തി സമ്പ്രദായമുള്ള മഹാക്ഷേത്രത്തിൽ തീവ്ര ബ്രഹ്മചര്യ നിഷ്ഠയോടെ മേൽശാന്തി ഇരു ഭഗവാന്മാരുടെയും പൂജാവിധികൾ യഥാവിധി അനുഷ്ഠിച്ച് ക്ഷേത്രമതിൽക്കകത്ത് തുടരും. ഒരു മേടവിഷു മുതൽ അടുത്ത മേട വിഷു വരെയാണ് മേൽശാന്തിയുടെ കാലാവധി. പുതിയ കീഴ്ശാന്തിയായി ശ്രീധര ഖജനായയും ഇന്ന് ചുമതലയേൽക്കും.