ചേർത്തല:എസ്.എൻ.ഡി.പി യോഗം ചേർത്തല യൂണിയന്റെ ആഭിമുഖ്യത്തിൽ ധന്യസാരഥ്യത്തിന്റെ രജത ജൂബിലി ആഘോഷത്തിന്റെ ഭാഗമായി നടത്തുന്ന മൂന്നാം ഘട്ട മൈക്രോഫിനാൻസ് വായ്പാ വിതരണത്തിന്റെയും ക്ഷേമപദ്ധതികളുടെ ഉദ്ഘാടനത്തിനും മുന്നോടിയായി യൂത്ത്മൂവ്മെന്റ് വാഹന വിളംബര ഘോഷയാത്ര നടത്തി. പൂച്ചാക്കൽ കമ്യൂണിറ്റി ഹാളിൽ 22 ന് വൈകിട്ട് 4 ന് എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശനാണ് വായ്പാ വിതരണം ഉദ്ഘാടനം ചെയ്യും.യൂത്ത് മൂവ്‌മെന്റ് ചേർത്തല യൂണിയൻ സമിതിയുടെയും പാണാവള്ളി പഞ്ചായത്ത് മേഖല സമിതിയുടെയും സംയുക്താഭിമുഖ്യത്തിലാണ് വിളംബര ജാഥ സംഘടിപ്പിച്ചത്.ചെങ്ങണ്ടയിൽ നിന്നും ആരംഭിച്ച ജാഥ അരുക്കിറ്റി മാത്താനം ക്ഷേത്രസന്നിധിയിൽ അവസാനിച്ചു. ചേർത്തല യൂണിയൻ അഡ്മിനിസ്‌ട്രേറ്റർ ടി.അനിയപ്പൻ ഫ്ളാഗ് ഒഫ് ചെയ്തു.യൂത്ത് മൂവ്‌മെന്റ് ചേർത്തല യൂണിയൻ പ്രസിഡന്റ് ജെ.പി.വിനോദ് അദ്ധ്യക്ഷത വഹിച്ചു. യോഗം ഡയറക്ടർ ബോർഡംഗം ബൈജു അറുകുഴി,യൂണിയൻ മുൻ കൗൺസിലർ ബിജു ദാസ്,യൂത്ത് മൂവ്‌മെന്റ് ജില്ല കമ്മറ്റി അംഗം പ്രിൻസ് പള്ളിപ്പുറം എന്നിവർ സംസാരിച്ചു.യൂത്ത് മൂവ്‌മെന്റ് യൂണിയൻ സെക്രട്ടറി അജയൻ പറയ കാട് സ്വാഗതവും വൈസ് പ്രസിഡന്റ് അഖിൽ അപ്പുക്കട്ടൻ നന്ദിയും പറഞ്ഞു. വിളംബര ജാഥ കടന്നു വന്ന വഴികളിൽ വിവിധ ശാഖയോഗങ്ങളുടെ നേതൃത്വത്തിൽ സ്വീകരണവും നൽകി.