ഹരിപ്പാട്: സ്ലാബ് മതിൽ കോൺഗ്രീറ്റ് തുണുകൾ കയറ്റിവന്ന മിനിലോറി കീഴ്മേൽ മറിഞ്ഞു. ലോറിയിലുണ്ടായിരുന്ന തൃശുർ സ്വദേശി സതീഷ് (25) നെ ഗുരുതരമായ പരിക്കുകളോടെ ആലപ്പുഴ മെഡിക്കൽ കോളേജിൽ പ്രവേശിപ്പിച്ചു. ലോറിയിലുണ്ടായിരുന്ന മറ്റ് മൂന്ന് പേർ പരിക്കി​ല്ലാതെ രക്ഷപ്പെട്ടു. ദേശീയപാതയിൽ കരുവാറ്റ എൻ.എസ്.എസ് ഹൈസ്കുളിന് സമീപം വ്യാഴാഴ്ച വെളുപ്പിനായിരുന്നു അപകടം. പാലക്കാട് നിന്നും കൊല്ലത്തേക്ക് വന്ന മിനിലോറി എതിരെ വന്ന വാഹനത്തിന് സൈഡു കൊടുക്കുമ്പോൾ നിയന്ത്രണം വിട്ട് ഹൈവേയിലെ സി.സി.ടി വി പോസ്റ്റും തകർത്ത് എതിർദിശയിലേക്ക് കീഴ്മേൽ മറിയുകയായി​രുന്നു. ലോറിയിലുണ്ടായിരുന്ന 4 പേരിൽ രണ്ട് പേർ വണ്ടിക്കുള്ളിലും പരിക്കേറ്റ സതീഷും മറ്റൊരാളും വാഹനത്തിന് മുകളിലുമായിരുന്നു ഇരുന്നത്. കോൺ ഗ്രീറ്റ് സ്ലാബുകളും തുണുകളും ഇരുവരുടെയും മുകളിലേക്ക് വീഴുകയായിരുന്നു. ഹരിപ്പാട്ട് നിന്നും ആംബുലൻസ് എത്തിയാണ് നാലു പേരെയും ആശുപത്രിയിലെത്തിച്ചത്.