പെരുമ്പാവൂർ: വാഴക്കുളം ബ്ലോക്ക് പഞ്ചായത്തിന്റെ ബഡ്ജറ്റിൽ ആരോഗ്യ മേഖലയ്ക്കും കാർഷിക മേഖലയ്ക്കും പട്ടിക ജാതി ക്ഷേമത്തിനും മുൻതൂക്കം. 27,75,10,521രൂപ വരവും 27,62,15,072 രൂപ ചിലവും പ്രതീക്ഷിക്കുന്ന ബഡ്ജറ്റ് വൈസ് പ്രസിഡന്റ് അജി ഹക്കീം അവതരിപ്പിച്ചു. ബ്ലോക്ക് പഞ്ചായത്ത് പ്രസിഡന്റ് കെ.എം. അൻവർഅലി അദ്ധ്യക്ഷത വഹിച്ചു. കാർഷിക മേഖലയ്ക്ക് 7871040 രൂപ വകയിരുത്തിയിട്ടുണ്ട്. ക്ഷീരകർഷകർക്ക് ഇൻസന്റീവ് നൽകുന്നതിന് ഇരുപത്തിയഞ്ച് ലക്ഷം,​ ബ്ലോക്ക് പഞ്ചായത്തിന്റെ വെങ്ങോല സാമൂഹ്യരോഗകേന്ദ്രത്തിൽ സംസ്ഥാന സർക്കാരിന്റെ ഒരുകോടി അൻപതുലക്ഷം മുടക്കി പുതിയ ഐസലേഷൻ വാർഡ് , മലയിടംതുരുത്തു സി.എച്ച്.സിയിൽ അടിസ്ഥാനസൗകര്യങ്ങൾ വികസിപ്പിക്കുന്നതിനു പി.വി. ശ്രീനിജിൻ എം.എൽ.എ അനുവദിച്ച 35 ലക്ഷം പ്രയോജനപെടുത്തി ഒ.പി വിഭാഗം കാര്യക്ഷമമാക്കും. രണ്ട് ഡോക്ടർമാരെയും നഴ്‌സിംഗ് സ്റ്റാഫിനെയും നിയമിക്കാനും ഫണ്ട് വകയിരുത്തിയിട്ടുണ്ട്.

സി.എച്ച്.സികളിൽ മരുന്നുവാങ്ങുന്നതിന് പത്തുലക്ഷത്തി അൻപതിനായിരം രൂപ മാറ്റിവെച്ചിട്ടുണ്ട്. പട്ടികജാതി വിഭാഗത്തിന്റെ വിവിധ പദ്ധതികൾക്കായി ഒരു കോടി എഴുപത്തി രണ്ട് ലക്ഷത്തി തൊണ്ണൂറ്റിരണ്ടായിരം രൂപയും പട്ടികവർഗ വിഭാഗത്തിന് മൂന്ന് ലക്ഷത്തി മൂവായിരം രൂപയും വകയിരുത്തിയിട്ടുണ്ട്. ഭവന പദ്ധതിക്കായി ഒരുകോടി എഴുപത്തിയെട്ടു ലക്ഷം രൂപയും വനിതാഘടക പദ്ധതിക്കായി 4383180 രൂപയും ഭിന്നശേഷിയുള്ളവരുടെ ക്ഷേമ പ്രവർത്തനങ്ങൾക്കായി ഇരുപത്തി രണ്ട് ലക്ഷവും വയോജനങ്ങൾക്കായി ഇരുപത്തിരണ്ട് ലക്ഷവും മാറ്റിവെച്ചിട്ടുണ്ട്. പശ്ചാത്തല മേഖലയിൽ പൊതുവിഭാഗത്തിൽ 6559200, എസി.സി. വിഭാഗത്തിൽ 5187600 രൂപയും ബഡ്ജറ്റിൽ വകയിരുത്തിയിട്ടുണ്ട്. ബ്ലോക്ക് പഞ്ചായത്തിന്റെ വിട്ട് കിട്ടിയ സ്ഥാപനങ്ങളുടെ നവീകരണത്തിനും പരിപാലനത്തിനുമായി ഒന്നര കോടി രൂപയും കേന്ദ്ര ധനകാര്യ കമ്മിഷൻ ഫണ്ട് ഉപയോഗിച്ച് ഒരു കോടി മുപ്പത്തിയൊന്ന് ലക്ഷത്തിന്റെ പദ്ധതികൾ നടപ്പിലാക്കാനും പദ്ധതിയുണ്ട്. അങ്കണവാടികൾ സ്മാർട് ആക്കുന്നതിനും പകൽ വീട് പ്രവർത്തനങ്ങൾ മുന്നോട്ട് കൊണ്ടു പോകുന്നതിനും വായനശാലകൾക്ക് ആധുനിക ഉപകരണങ്ങൾ നൽകുന്നതിനും ക്ലബ്ബുകൾക്ക് സ്‌പോർട്‌സ് കിറ്റുകൾ നൽകുന്നതിനും ബഡ്ജറ്റ് ലക്ഷ്യമിടുന്നുണ്ട്.