മൂവാറ്റുപുഴ: ഫണ്ട് അനുവദിച്ചിട്ടും റോഡ് നിർമ്മാണം വൈകുന്നതിനെതിരെ പ്രദേശവാസികൾ പ്രക്ഷോഭത്തിലേക്ക്. പായിപ്ര ഗ്രാമപഞ്ചായത്ത് ഏഴാംവാർഡിലെ ഒന്നാംമൈൽ- കാരമോളേൽ റോഡിന് ഫണ്ട് അനുവദിച്ച് ടെൻഡർ നടപടികൾ പൂർത്തിയാക്കിയിട്ടും നിർമ്മാണം ആരംഭിക്കാത്തതിനെതിരെ പ്രദേശവാസികൾ പ്രക്ഷോഭത്തിനൊരുങ്ങുന്നത്.

എം.എൽ.എ ആയിരുന്ന എൽദോ എബ്രഹാമിന്റെ ആസ്തിവികസന ഫണ്ടിൽനിന്ന് കഴിഞ്ഞ സർക്കാരിന്റെ കാലത്ത് റോഡ് നവീകരണത്തിനായി 15ലക്ഷംരൂപ അനുവദിക്കുകയും ഇതിന്റെ ടെൻഡർ നടപടികൾ പൂർത്തിയാക്കുകയും ചെയ്തിരുന്നു. നിയമസഭാ തിരഞ്ഞെടുപ്പ് പ്രഖ്യാപിച്ച് പെരുമാറ്റച്ചട്ടം നിലവിൽ വന്നതോടെ റോഡ് നിർമ്മാണവും നിലച്ചു. എന്നാൽ തിരഞ്ഞെടുപ്പ് കഴിഞ്ഞ് ഒരുവർഷം കഴിഞ്ഞിട്ടും റോഡ് നിർമ്മാണം ആരംഭിക്കാത്തതിനെതിരെയാണ് പ്രതിഷേധമുയരുന്നത്.

 ടാർ ചെയ്തത് അഞ്ചുവർഷം മുമ്പ്

പുതുപ്പാടി-ഇരുമലപ്പടി റോഡിലെ ഒന്നാംമൈലിൽ നിന്നാരംഭിച്ച് അട്ടായം-മുളവൂർ പി.ഒ ജംഗ്ഷൻ റോഡിലെ വത്തിക്കാൻ സിറ്റിയിൽ അവാസാനിക്കുന്ന പഞ്ചായത്തിലെ പ്രധാന റോഡുകളിലൊന്നാണിത്. അഞ്ചുവർഷംമുമ്പ് ടാർചെയ്ത റോഡ് ഇപ്പോൾ പൂർണ്ണമായും തകർന്ന് തരിപ്പണമായി കാൽനടയാത്രപോലും ദുസ്സഹമായിരിക്കുകയാണ്. വേനൽമഴ പെയ്തതോടെ വെള്ളക്കെട്ടും ചെളിയും രൂപപ്പെട്ടതിനാൽ വാഹനങ്ങൾ കടന്നുപോകുമ്പോൾ അപകടം ഉറപ്പാണ്. റോഡിന്റെ ശോച്യാവസ്ഥയെത്തുടർന്ന് പ്രദേശത്ത് ഓട്ടം വിളിച്ചാൽ ഓട്ടോറിക്ഷകൾ വരാത്ത അവസ്ഥയാണ്. എന്നാൽ പ്രദേശത്തെ മറ്റ് റോഡുകളെല്ലാം നവീകരണ പ്രവർത്തനം പൂർത്തിയാക്കി. ഒന്നാംമൈൽ-കാരമോളേൽ റോഡിനോട് പഞ്ചായത്ത് അധികൃതരും വാർഡ് മെമ്പറും കാണിക്കുന്ന അവഗണനയിൽ പ്രതിഷേധിച്ച് പ്രദേശവാസികൾ പഞ്ചായത്ത് ഓഫീസിലേക്ക് മാർച്ചുചെയ്യാൻ ഒരുങ്ങുകയാണ്.