അങ്കമാലി : മരുമകളായി എത്തി അങ്കമാലിക്ക് പ്രിയങ്കരിയായി മാറിയ എം.സി ജോസഫൈന്റെ അപ്രതീക്ഷിത

വി​യോഗം നാട്ടുകാർക്ക് തീരാദു:ഖമായി. അടിയന്തരാവസ്ഥക്കാലത്ത് പള്ളിപ്പാട്ട് പി.എ മത്തായിയുടെ ജീവി​തസഖി​​യായാണ് വൈപ്പിൻ സ്വദേശിനിയായ ജോസഫൈൻ അങ്കമാലിയി​ലേക്ക് വരുന്നത്. എ.പി കുര്യനോടുള്ള അടുപ്പം ഇരുവരെയും സി.പി.എമ്മി​ലേക്കെത്തിച്ചു. സ്ത്രീകൾക്കി​ടയിൽ ഏറെ സ്വീകാര്യയായ ജോസഫൈന്റെ വളർച്ച ദ്രുതഗതിയിലായിരുന്നു. അങ്ങാടിക്കടവ് ബ്രാഞ്ചംഗമായി തുടങ്ങി കേന്ദ്ര കമ്മിറ്റിയംഗം വരെയെത്തിയ സംഘടനാ ജീവി​തം. യാഥാസ്ഥിതിക ക്രിസ്ത്യൻ പശ്ചാത്തലത്തിൽനിന്ന് വന്ന അവർ മതപരമായ കെട്ടുപാടുകൾ പൊട്ടിച്ചാണ് പ്രത്യയശാസ്ത്രത്തിലധിഷ്ഠിതമായ ആശയങ്ങളെ ഉൾക്കൊണ്ടത്. മരണത്തി​ലും മാറ്റമൊന്നുമുണ്ടായില്ല. അങ്കമാലി സി.എസ്.എയിൽ പരസ്പരം പൂമാല ഇട്ടുകൊണ്ടുള്ള ലളിതമായ വിവാഹ ചടങ്ങ് ഇന്നും സുഹൃത്തുക്കളുടെ ഓർമയിലുണ്ട്. അതേ ഹാളാണ് ചേതനയറ്റ ജോസഫൈന്റെ പൊതുദർശനത്തി​നും വേദി​യാകുന്നത്.

എന്നും കണിശതയുള്ള സ്ത്രീപക്ഷവാദിയായിരുന്നു ജോസഫൈൻ. സ്ത്രീപക്ഷ ചിന്ത പരാമർശിക്കാതെ ജോസഫൈന്റെ ഒരു പ്രസംഗവും കടന്നുപോയിട്ടില്ല. അങ്കമാലിയിലെ ഏത് ചെറിയ പരിപാടിക്കു വിളിച്ചാലും ഒരു മടിയും കൂടാതെ പങ്കെടുക്കുന്നയാളാണ് ജോസഫൈൻ. വ്യക്തിപരമായ ഏത് അഭിപ്രായ വ്യത്യാസത്തിലും പാർട്ടി​യായിരുന്നു അവർക്ക് വലുത്. വി​പുലമായ വായനാശീലമാണ് ജോസഫൈന്റെ മറ്റൊരു പ്രത്യേകത.