മൂവാറ്റുപുഴ: മൂവാറ്റുപുഴയിൽ പൂർണതോതിൽ അണ്ടർഗ്രൗണ്ട് രീതിയിൽ വൈദ്യുതി കേബിളുകൾ മാറ്റുമെന്ന് മാത്യു കുഴൽനാടൻ എം.എൽ.എ പറഞ്ഞു. ക്ലീൻ മൂവാറ്റുപുഴ കാമ്പയിൻ ഉദ്ഘാടനം ചെയ്യുകയായിരുന്നു അദ്ദേഹം. മൂവാറ്റുപുഴ നിർമ്മല ഹൈസ്കൂൾ ഓഡിറ്റോറിയത്തിൽ നടന്ന യോഗത്തിൽ നഗരസഭ ചെയർമാൻ പി.പി. എൽദോസ് അദ്ധ്യക്ഷത വഹിച്ചു. നഗരം മാലിന്യമുക്തമാക്കുന്നതിനും സൗന്ദര്യവത്കരിക്കുന്നതിനുമായി പത്തിന പരിപാടികൾ നഗരസഭ നടപ്പാക്കുമെന്ന് ചെയർമാൻ പി.പി. എൽദോസ് പറഞ്ഞു. ഭൗമദിന സന്ദേശം നൽകിയ ഫാ. ഡേവിസ് ചിറമേൽ 101 ഇലഞ്ഞിമരങ്ങൾ മൂവാറ്റുപുഴയ്ക്കായി സമ്മാനിച്ചു.

ക്ലീൻ മൂവാറ്റുപുഴ കാമ്പയിന്റെ ഭാഗമായി സർക്കാർ ഓഫീസുകൾ, സ്കൂളുകൾ, കോളേജുകൾ എന്നിവ പൂർണതോതിൽ ആദ്യഘട്ടത്തിൽ ശുചീകരിക്കും. പിന്നീട് ഈ സ്ഥാപനങ്ങളിൽ ജനകീയ കമ്മിറ്റിയുടെ ആഭിമുഖ്യത്തിൽ ശുചീകരണ പ്രവർത്തനങ്ങൾക്ക് മേൽനോട്ടം വഹിക്കും മർച്ചൻസ് അസോസിയേഷന്റെ ആഭിമുഖ്യത്തിൽ എല്ലാ വ്യാപാരവ്യവസായ സ്ഥാപനങ്ങളിലും ശുചീകരണ പ്രവർത്തനങ്ങൾ നടത്തുമെന്ന് പ്രസിഡന്റ് അജ്മൽ ചക്കുങ്കൽ പറഞ്ഞു.

മുവാറ്റുപുഴ പൊലീസ് സ്റ്റേഷനിൽ ഇലഞ്ഞിമരം നട്ട് സി.ഐ എം.കെ. സജീവ് സംസാരിച്ചു. മൂവാറ്റുപുഴ നഗരസഭ, ട്രീ പണ്ടപ്പിള്ളി, നിർമല കോളേജ് - നിർമ്മല സ്കൂൾ, മർച്ചന്റ്സ് അസോസിയേഷൻ എന്നിവയുടെ നേതൃത്വത്തിലാണ് ക്ലീൻ മൂവാറ്റുപുഴ കാമ്പയി‍ൻ പദ്ധതി നടപ്പാക്കുന്നത്. ഒരുവർഷംകൊണ്ട് പദ്ധതി വിജയകരമായി പൂർത്തിയാകുമെന്ന് പദ്ധതി ചീഫ് കോ ഓർഡിനേറ്റർ ഫാ. ഡോ. ആന്റണി പുത്തൻകുളം പറഞ്ഞു. എക്സൈസ് ഡെപ്യൂട്ടി കമ്മീഷണർ പി.വി. ഏലിയാസ്, വൈസ് ചെയർമാൻ സിനി ബിജു, സ്റ്റാൻഡിംഗ് കമ്മിറ്റി ചെയർമാൻ പി.എം. അബ്ദുൾ സലാം, കൗൺസിലർമാരായ ജോസ് കുര്യാക്കോസ്, ജിനു മടക്കൽ, അമൽ ബാബു, ജോളി മണ്ണൂർ, ബ്ളോക്ക് പഞ്ചായത്ത് പ്രസിഡന്റ് പ്രൊഫ. ജോസ് അഗസ്റ്റിൻ, നിർമ്മല കോളേജ് പ്രിൻസിപ്പൽ ഡോ. കെ.വി. തോമസ്, ദീപു ജേക്കബ്, സി.വി. ജോസ്, ജോൺ കുര്യാക്കോസ്, എൽദോബാബു വട്ടക്കാവിൽ, രാജീവ്‌ നായർ, രാജേഷ് മാത്യു എന്നിവർ സംസാരിച്ചു.