കുറുപ്പംപടി : ജില്ലാ കിസാൻ മേളയ്ക്ക് കുറുപ്പംപടിയിൽ തുടക്കമായി. ഇന്ത്യയിൽ കാർഷിക മേഖലയുടെ ഉന്നമനത്തിന് പ്രത്യേക കാർഷിക ബഡ്ജറ്റ്അനിവാര്യമാണെന്ന് ബെന്നി ബെഹനാൻ എം.പി പറഞ്ഞു. കൃഷി വകുപ്പ് അഗ്രികൾച്ചർ ടെക്‌നോളജി മാനേജ്‌മെന്റ് ഏജൻസിയുടെയും (ആത്മ) കൃഷി വിജ്ഞാൻ കേന്ദ്രത്തിന്റെയും സംയുക്താഭിമുഖ്യത്തിൽ കുറുപ്പംപടി സിറിയൻ ക്രിസ്ത്യൻ യൂത്ത് ലീഗ് ഹാളിൽ സംഘടിപ്പിച്ച ജില്ലാ കിസാൻ മേള ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

ഉത്പാദനം, സംഭരണം, സംസ്‌കരണം, വിപണനം എന്നീ മേഖലകളിലെ ആധുനിക സാങ്കേതിക വിദ്യകൾ കർഷകരിലേക്ക് എത്തിയാൽ മാത്രമേ പുതുതലമുറയെ കൃഷിയിലേക്ക് ആകർഷിക്കാനാകൂ. പുതിയ വിപണന തന്ത്രങ്ങളിലൂടെ മാത്രമേ ചൂഷണങ്ങളെ അതിജീവിക്കാനുള്ള കഴിവ് കർഷകന് ലഭിക്കുകയുള്ളുവെന്നും എംപി പറഞ്ഞു.

ചടങ്ങിൽ എൽദോസ് കുന്നപ്പിള്ളി എം.എൽ.എ അദ്ധ്യക്ഷത വഹിച്ചു. നൂതനാശയങ്ങൾ കർഷകരിലേക്ക് എത്തിക്കാൻ ഇത്തരം കാർഷികമേളകൾക്ക് സാധിക്കുമെന്ന് എം.എൽ.എ പറഞ്ഞു. 'ആസാദി കാ അമൃത് മഹോത്സവ് ' കിസാൻ ഭാഗീദാരി പ്രാഥമികതാ ഹമാരി കാമ്പയിന്റെ ഭാഗമായി സംഘടിപ്പിച്ച മേളയിൽ കാർഷിക സെമിനാറുകൾ, കർഷക ശാസ്ത്രജ്ഞ മുഖാമുഖം, കാർഷികോത്പന്നങ്ങളുടെ പ്രദർശനവും വില്പനയും, മൃഗസംരക്ഷണ ക്ഷീര വികസന വകുപ്പിന്റെ പ്രദർശന വില്പന സ്റ്റാളുകൾ, സഞ്ചരിക്കുന്ന മണ്ണുപരിശോധനാ ലാബ്, കാർഷികോത്പന്നങ്ങളുടെ വിപണനം എന്നിവ ഒരുക്കിയിട്ടുണ്ട്.

ജില്ലയിൽ നിന്നുള്ള സംസ്ഥാന കാർഷിക അവാർഡ് ജേതാക്കളായ സെന്റ് ജോസഫ് ബോയ്‌സ് ഹോസ്റ്റൽ കൂനമ്മാവ്, അങ്കമാലി കരിങ്കൽ പുരം വെജിറ്റബിൾ ക്ലസ്റ്റർ മഞ്ഞപ്ര എന്നിവരെ വേദിയിൽ ആദരിച്ചു. ജില്ലാ ഡവലപ്‌മെന്റ് കമ്മിഷണർ എ.ഷിബു മുഖ്യപ്രഭാഷണം നടത്തി. കൂവപ്പടി ബ്ലോക്ക് പഞ്ചായത്ത് പ്രസിഡന്റ് ബേസിൽ പോൾ, പെരുമ്പാവൂർ നഗരസഭാ ചെയർമാൻ ടി.എം സക്കീർ ഹുസൈൻ, ബ്ലോക്ക് പഞ്ചായത്ത് വൈസ് പ്രസിഡന്റ് മോളി തോമസ്, ഗ്രാമപഞ്ചായത്ത് പ്രസിഡന്റുമാരായ എൻ.പി അജയകുമാർ, ഷിജി ഷാജി, പി.പി അവറാച്ചൻ, മിനി ബാബു, ജില്ലാ പഞ്ചായത്ത് അംഗങ്ങളായ മനോജ് മൂത്തേടൻ, ശാരദ മോഹൻ, ഷൈമി വർഗീസ്, ബ്ലോക്ക് പഞ്ചായത്ത് സ്ഥിരം സമിതി അദ്ധ്യക്ഷരായ സി.ജെ. ബാബു, അനു അബീഷ്, കാർഷിക വിജ്ഞാൻ കേന്ദ്രം പിൻസിപ്പൽ സയന്റിസ്റ്റ് ഷിനോജ് സുബ്രഹ്മണ്യൻ, ആത്മ പ്രൊജക്ട് ഡയറക്ടർ ഷീല പോൾ, കൃഷി വകുപ്പ് ഡെപ്യൂട്ടി ഡയറക്ടർമാരായ അനിത ജെയിംസ്, സെറിൻ ഫിലിപ്പ്, തോമസ് സാമുവൽ, ബോബി പീറ്റർ, മൃഗസംരക്ഷണ വകുപ്പ് ഡെപ്യൂട്ടി ഡയറക്ടർ ഡോ.എ.ഗോപകുമാർ, കൃഷി അസിസ്റ്റന്റ് ഡയറക്ടർ പി.എൻ മോളി, സീനിയർ വെറ്റിനറി സർജൻ സന്ധ്യ ജി.നായർ എന്നിവർ പങ്കെടുത്തു. കിസാൻ മേള ഇന്ന് സമാപിക്കും.