പീരുമേട്: കുട്ടിക്കാനം മരിയൻ കോളേജിന്റെ 27-ാമത് കോളേജ് ദിനാഘോഷവും ദീർഘകാലമായി പ്രിൻസിപ്പലായ ഡോ. റോയി അബ്രാഹമിന്റെ യാത്രയയപ്പ് സമ്മേളനവും ഇന്ന് രാവിലെ 10ന് നടക്കും. അദ്ധ്യാപകൻ, ഹോസ്റ്റൽ വാർഡൻ, വകുപ്പ് മേധാവി, വൈസ് പ്രിൻസിപ്പൽ, പ്രിൻസിപ്പൽ എന്നിങ്ങനെ വിവിധ തലങ്ങളിൽ നീണ്ട 25 വർഷത്തെ സേവനത്തിനൊടുവിലാണ് വിദ്യാർത്ഥികളുടെയും സഹപ്രവർത്തകരുടെയും പ്രിയങ്കരനായ റോയിയച്ചൻ കോളേജിനോട് വിടപറയുന്നത്. മരിയൻ കോളേജ് യൂണിയൻ ചെയർമാൻ ജോജോ ജോസ് അദ്ധ്യക്ഷത വഹിക്കുന്ന സമ്മേളനത്തിൽ അഡ്മിനിസ്‌ട്രേറ്റർ ഫാദർ ജോസഫ് പൊങ്ങന്താനം സ്വാഗതം ആശംസിക്കും. കോളേജ് രക്ഷാധികാരി ബിഷപ്പ് മാർ ജോസ് പുളിക്കൽ ഉദ്ഘാടനം നിർവഹിക്കും. കാഞ്ഞിരപ്പള്ളി രൂപതാ മുൻ അദ്ധ്യക്ഷൻ മാർ മാത്യു അറയ്ക്കൽ അനുഗ്രഹ പ്രഭാഷണം നടത്തും. വാഴൂർ സോമൻ എം.എൽ.എ, കോളേജ് മാനേജരും വികാരി ജനറാളുമായ ഫാ. ബോബി അലക്‌സ് മണ്ണംപ്ലാക്കൽ എന്നിവർ ആശംസകളറിയിക്കും. വിവിധ ഘടകങ്ങളെ പ്രതിനിധീകരിച്ച് ഡോ. റൂബിൾ രാജ്, ഡോ. ജോബി സിറിയക്, സണ്ണി തോമസ്, എലിസബത്ത് മരിയ തോമസ്, ഡോ. ജയിംസ് തലച്ചെല്ലൂർ, സി. എലിസബത്ത്, ബിനോയ് ജോസഫ്, തോമസ് ആന്റണി എന്നിവർ സംസാരിക്കും. ഡോ. അജിമോൻ ജോർജ്, ഡിനോ ബെന്നി എന്നിവർ റിപ്പോർട്ടുകൾ അവതരിപ്പിക്കും. ഡോ. ലിജിൻ ഉപഹാരം സമർപ്പിക്കും. വിരമിക്കുന്ന ഡോ. റോയി അബ്രഹാമിന്റെ മറുപടി പ്രസംഗത്തിനുശേഷം കോളേജ് വൈസ് പ്രിൻസിപ്പൽ ഡോ. രാജിമോൾ എ നന്ദി പ്രകാശനം നടത്തും. ഉച്ചകഴിഞ്ഞ് കോളേജ് യൂണിയന്റെ നേതൃത്വത്തിൽ വിവിധ കലാപരിപാടികൾ അരങ്ങേറും. യാത്രയയപ്പ് പരിപാടിയുടെ കൺവീനർമാരായ ഡോ. ജോഷി ജോൺ, ഡോ. ജോബി സിറിയക്ക് എന്നിവർ വിവിധ പരിപാടികൾക്ക് നേതൃത്വം നൽകും.