കട്ടപ്പന : ചക്കുപള്ളം പഞ്ചായത്തിനെ കേരളത്തിലെ ആദ്യത്തെ സമ്പൂർണ ആരോഗ്യ സാക്ഷരതാ പഞ്ചായത്തായി മാറ്റാനുള്ള യജ്ഞത്തിന്റെ ഭാഗമായി 'സഞ്ജീവനി ' എന്ന പേരിൽ ബേസിക് ലൈഫ് സപ്പോർട്ട് ട്രെയിനിങ് പ്രോഗ്രാം സംഘടിപ്പിച്ചു.ജെ.സി.ഐ തേക്കടി, സഹ്യാദ്രി അണക്കരയും ചക്കുപള്ളം
പഞ്ചായത്തും സംയുക്തമായി കാരിത്താസ് ആശുപത്രിയുമായി സഹകരിച്ചാണ് പരിപാടി സംഘടിപ്പിച്ചത്. ട്രെയിനിങ് പ്രോഗ്രാം ഗ്രാമ പഞ്ചായത്ത് പ്രസിഡന്റ് പി.കെ രാമചന്ദ്രൻ ഉദ്ഘാടനം ചെയ്തു.യോഗത്തിൽ ജെ.സി.ഐ പ്രസിഡന്റ് അഭിലാഷ് ജി നായർ അധ്യക്ഷത വഹിച്ചു. കാരിത്താസ് അത്യാഹിത വിഭാഗം മേധാവി ഡോ വിവേകിന്റെ നേതൃത്വത്തിലുള്ള ആറംഗ സംഘം ക്ലാസുകൾക്ക് നേതൃത്വം നൽകി. ചികിത്സ മേഖലയിൽ ഒരു പുത്തൻ ഉണർവ് നൽകുക എന്ന ലക്ഷ്യത്തോടെയാണ് പദ്ധതി നടപ്പിലാക്കുന്നത്. പ്രാഥമിക അപകട ശുശ്രൂഷ, പെട്ടെന്നുണ്ടാകുന്ന ഹൃദയസ്തംഭനം, ജീവിത ശൈലി രോഗങ്ങൾ, പൊള്ളൽ, മുറിവ്, ഒടിവ്, പാമ്പുകടി എന്നിവ സംഭവിച്ചാൽ പ്രാഥമികമായി രോഗിയുടെ ജീവൻ രക്ഷിക്കുന്നതിനായി ചെയ്യേണ്ടത് എന്തെല്ലാമെന്ന് ട്രെയിനിങ് സെക്ഷനിൽ വിശദീകരിച്ചു. 75 ഓളം വരുന്ന വോളന്റീയർമാർ ട്രെയിനിങ്ങിൽ പങ്കെടുത്തു. ജില്ലാ പഞ്ചായത്ത് അംഗം രാരിച്ചൻ നീറണാക്കുന്നേൽ മുഖ്യപ്രഭാഷണം നടത്തി. ട്രെയിനിങ് പ്രോഗ്രാമിൽ പങ്കെടുത്തവർക്ക് സർട്ടിഫിക്കറ്റുകളും വിതരണം ചെയ്തു.