ഇടുക്കി: ജില്ലയിൽ മേയ് 17 ന് തദ്ദേശ സ്വയംഭരണ സ്ഥാപനങ്ങളിലേക്കുള്ള ഉപതിരഞ്ഞെടുപ്പ് നടത്തും. ജില്ലയിൽ ഉടുമ്പന്നൂർ ഗ്രാമപഞ്ചായത്തിലെ വാർഡ് 12 , അയ്യപ്പൻകോവിൽ ഗ്രാമ പഞ്ചായത്തിലെ വാർഡ് 14 , ഇടമലക്കുടി ഗ്രാമ പഞ്ചായത്തിലെ വാർഡ് 11 എന്നീ വാർഡുകളിലേക്കാണ് ഉപതെരഞ്ഞെടുപ്പ് നടത്തുന്നത്. ഏപ്രിൽ 27 വരെ നാമനിർദ്ദേശപത്രിക സ്വീകരിക്കും. ഏപ്രിൽ 28ന് സൂക്ഷ്മ പരിശോധന നടത്തും. സ്ഥാനാർത്ഥിത്വം പിൻവലിക്കുന്നതിനുള്ള അവസാന തീയതി ഏപ്രിൽ 30, വോട്ടെടുപ്പ് മേയ് 17 രാവിലെ 7 മുതൽ വൈകുന്നേരം 6 വരെ. വേട്ടേണ്ണൽമേയ് 18ന് രാവിലെ 10 മുതൽ ആരംഭിക്കും.

ഉപതെരഞ്ഞെടുപ്പ് വിജ്ഞാപനം ചെയ്ത 2022 ഏപ്രിൽ 13 മുതൽ മാതൃകാ പെരുമാറ്റച്ചട്ടം നിലവിൽ വന്നു. തെരഞ്ഞെടുപ്പ് നടപടിക്രമങ്ങൾ പൂർത്തിയാകുന്ന ദിവസം വരെ മാതൃകാ പെരുമാറ്റച്ചട്ടം നിലവിൽ ഉണ്ടായിരിക്കും. ഗ്രാമപഞ്ചായത്തിൽ ഏതെങ്കിലും ഒരു വാർഡിലോ വാർഡുകളിലോ നടക്കുന്ന തെരഞ്ഞെടുപ്പ് ആണെങ്കിൽ കൂടി ആ ഗ്രാമപഞ്ചായത്തിലെ മുഴുവൻ വാർഡുകളിലും മാതൃകാ പെരുമാറ്റച്ചട്ടം ബാധകമായിരിക്കുമെന്ന് ജില്ലാ കളക്ടർ വ്യക്തമാക്കി.