തലശേരി: കൈയേറ്റം ഒഴിപ്പിക്കാനെത്തിയ നഗരസഭാ ഉദ്യോഗസ്ഥരെ സ്ഥാപന ഉടമകൾ തടഞ്ഞതിനെ തുടർന്ന് കണ്ടിക്കൽ വ്യവസായ എസ്റ്റേറ്റിൽ സംഘർഷം. ഇന്നലെ രാവിലെയാണ് സംഭവം. വിവിധങ്ങളായ 22 ചെറുകിട വ്യവസായ സംരംഭങ്ങൾ ഇവിടെ പ്രവർത്തിക്കുന്നുണ്ട്. ഇതിൽ 14 ഓളം സ്ഥാപനങ്ങൾ അവർക്ക് അനുവദിച്ച സ്ഥലത്തിന് പുറമെ തൊട്ടുള്ള ഭാഗം കൂടി കൈയേറി സ്വന്തമാക്കിയതായി നഗരസഭാ റവന്യൂ ഉദ്യോഗസ്ഥർ കണ്ടെത്തി.

മാത്രമല്ല ഇവരുടെ മാസവാടകയും ഡെപ്പോസിറ്റും ഏറെ കുടിശ്ശികയുണ്ടത്രെ. ഇത് തീർത്തടക്കണമെന്നും കൈയേറിയ സ്ഥലത്ത് നിന്നും ഒഴിയണമെന്നും ആവശ്യപ്പെട്ട് നിരവധി തവണ ഉദ്യോഗസ്ഥർ നേരിട്ടും നോട്ടീസ് മുഖേനയും അനധികൃത ക്കാരെ ബന്ധപ്പെട്ടിരുന്നു. എന്നാൽ ഇവർ കുടിശ്ശിക അടക്കാനോ പിന്മാറാനോ തയ്യാറായില്ല. ഇതേ തുടർന്നാണ് ഇന്നലെ രാവിലെ പൊലീസ് സഹായത്തോടെ നഗരസഭാ റവന്യൂ വിഭാഗം സ്ഥലത്തെത്തിയത്.