ഇരിട്ടി: അസം സ്വദേശിനി മുൻമി ഗൊഗോയ്ക്ക് സുരേഷ് ഗോപി എം.പി യുടെ കൈത്താങ്ങിൽ നിർമ്മിച്ച വീടിന്റെ താക്കോൽ കൈമാറി. തില്ലങ്കേരിയിലെ കാർക്കോടാണ് വീട് നിർമ്മിച്ചത്. കഴിഞ്ഞ ത്രിതല പഞ്ചായത്ത് തിരഞ്ഞെടുപ്പിൽ ഇരിട്ടി മുനിസിപ്പാലിറ്റിയിൽ ബി.ജെ.പി സ്ഥാനാർത്ഥിയായിരുന്നു പയഞ്ചേരി സ്വദേശിയായ കെ.എൻ. സജേഷിന്റെ ഭാര്യ മുൻമി. സ്വന്തമായി വീടില്ലാതെ രണ്ടു പെൺമക്കൾക്കൊപ്പം വാടക വീട്ടിൽ കഴിയുകയായിരുന്ന മുൻമിയെ കുറിച്ചുള്ള വാർത്ത സുരേഷ് ഗോപിയുടെ ശ്രദ്ധയിൽ പെടുകയും വീട് നിർമ്മിക്കാൻ ആവശ്യമായ തുക അദ്ദേഹം വാഗ്ദാനം ചെയ്യുകയുമായിരുന്നു. തില്ലങ്കേരി കാർക്കോട് ജീവകാരുണ്യ പ്രവർത്തകനായ ഡോ. പി. സലിം നൽകിയ സ്ഥലത്താണ് വീട് പണിതിരിക്കുന്നത്. ചടങ്ങിൽ ഹിന്ദു ഐക്യവേദി സംസ്ഥാന വർക്കിംഗ് പ്രസിഡന്റ് വത്സൻ തില്ലങ്കേരി, ബി.ജെ.പി സംസ്ഥാന സെക്രട്ടറി കെ. രഞ്ജിത്ത്, ജില്ലാ ജനറൽ സെക്രട്ടറിമാരായ എം.ആർ. സുരേഷ്, ബിജു എളക്കുഴി, മണ്ഡലം പ്രസിഡന്റ് സത്യൻ കൊമ്മേരി, ജിതിൻ കൂടാളി, പി.എസ് പ്രകാശ്, ഹരിഹരൻ മാവില, സ്ഥലം സൗജന്യമായി നൽകിയ ഡോ. പി. സലിം പങ്കെടുത്തു. ശില്പകലാ വിദഗ്ദ്ധൻ ജോജു പുന്നാട് നിർമ്മിച്ച മനോഹരമായ ജീവൻ തുടിക്കുന്ന മുത്തപ്പ ശിൽപ്പം ഉപഹാരമായി സുരേഷ് ഗോപിക്ക് കൈമാറി.