തലയോലപ്പറമ്പ്. ചരിത്രപ്രസിദ്ധമായ വടയാർ ആ​റ്റുവേലയ്ക്ക് നാടൊരുങ്ങി. മൂവാ​റ്റുപുഴയാറിന്റ ഓളപ്പരപ്പിനെ പ്രകാശമാനമാക്കുന്ന ജലോത്സവമായ ആറ്റുവേലയ്ക്കായുള്ള ആ​റ്റുവേലച്ചാടിന്റെ നിർമാണവും പൂർത്തിയായി. രണ്ട് വലിയ കേവ് വള്ളങ്ങളിൽ തട്ടിട്ട് അതിൽ ക്ഷേത്രമാതൃകയിൽ മൂന്നു നിലകളിലായി നിർമ്മിച്ച ആ​റ്റുവേല ചാടാണ് ഈ ഉത്സവത്തിന്റെ മുഖ്യആകർഷണം. അവകാശികളുടെ നിർദ്ദേശാനുസരണം ദേശക്കാർ തന്നെയാണ് ആ​റ്റുവേലച്ചാട് നിർമ്മിക്കുന്നത്. ഇതിന്റെ ഭാഗമായി ക്ഷേത്രത്തിൽ കഴിഞ്ഞ ദിവസം പിണ്ടിപ്പൊഴുത് ചടങ്ങു നടന്നു. 64 തൂശനിലകളിലായി നിവേദ്യങ്ങൾ നിരത്തി, രാശി നോക്കിയാണ് ഈ ചടങ്ങ് നടത്തുന്നത്. മീനമാസത്തിലെ അശ്വതി നാളിലാണ് ആ​റ്റുവേല ഉത്സവം.

ഇന്ന് രാവിലെ ഇളങ്കാവ് ക്ഷേത്രത്തിൽ നിന്ന് പ്രത്യേക പൂജകൾക്ക് ശേഷം ആ​റ്റുവേല ചാട് ക്ഷേത്രത്തിന്റെ വടക്ക് പടിഞ്ഞാറ് രണ്ട് കിലോമീ​റ്റർ മാറി ആറ്റുവേല കടവിലേക്ക് കൊണ്ടു പോകും. മീനമാസത്തിലെ അശ്വതി നാളിൽ 18നാഴിക പുലരുമ്പോൾ ആ​റ്റുവേല ചാടിന്റെ മുകളിലെ നിലയിൽ സർവാഭരണ വിഭൂഷിതയായ കൊടുങ്ങല്ലൂരമ്മയെ ആവാഹിച്ച് ഇരുത്തും. പുറക്കളത്തെ ഗുരുതിക്ക് ശേഷം ഇളങ്കാവിലേക്ക് പുറപ്പെടും. നിലവിളക്കുകളും, നിരവധി കുത്തുവിളക്കുകളും വൈദ്യുത ദീപങ്ങളും കൊണ്ടലംകൃതമായ ആ​റ്റുവേലചാട് മൂവാ​റ്റുപുഴയാറിന്റെ ഓളപരപ്പിനെ വർണാഭമാക്കി ഇളങ്കാവ് ക്ഷേത്രക്കടവിലേക്ക് പ്രയാണം ആരംഭിക്കും. വിവിധ കരക്കാരുടെയും വീട്ടുകാരുടെയും സംഘടനകളുടെയും വഴിപാടായി വാദ്യമേളങ്ങളും ഗരുഡൻ പറവയുമായെത്തുന്ന തൂക്കച്ചാടുകൾ ഇതിന് അകമ്പടിയേകും. നാളെ പുലർച്ചെ നാലിനാണ് ആ​റ്റുവേല ദർശനം. ആ​റ്റുവേല കാണുവാൻ വിദേശികളടക്കം സംസ്ഥാനത്തിന്റെ വിവിധ ഭാഗങ്ങളിൽ നിന്ന് ആയിരങ്ങൾ മൂവാ​റ്റുപുഴയാറിന്റെ ഇരുകരകളിലും തടിച്ചുകൂടും.