പാലാ: ക്ഷേത്രങ്ങളിൽ വിഷുമഹോത്സവത്തിന് ഒരുക്കങ്ങളായി. വിഷുവിളക്ക്, ദീപക്കാഴ്ച, വിശേഷാൽ ദീപാരാധന എന്നിവ എല്ലാ ക്ഷേത്രങ്ങളിലും നടക്കും. പുലർച്ചെ 5ന് വിഷുക്കണി ദർശനവും ഒരുക്കിയിട്ടുണ്ട്.

ഭരണങ്ങാനം ശ്രീകൃഷ്ണസ്വാമി ക്ഷേത്രത്തിൽ അഭിഷേക കാവടി, തിരുവാതിരകളി, കണിദർശനം, കാവടിഘോഷയാത്ര, വിഷുവിളക്ക്, നൃത്തനാടകം എന്നിവ നടക്കും.

ഏഴാച്ചേരി കാവിൻപുറം ഉമാമഹേശ്വര ക്ഷേത്രത്തിൽ നാളെ വിഷുമഹോത്സവവും വിഷുക്കൈനീട്ട വിതരണവും നടക്കും. വിഷുനാളിൽ എത്തിച്ചേരുന്ന മുഴുവൻ ഭക്തർക്കും ഉമാമഹേശ്വരൻമാരുടെ കൈനീട്ടം ലഭിക്കും.
വിഷുനാളിൽ പുലർച്ചെ 5 ന് നടതുറപ്പും വിഷുക്കണി ദർശനവുമുണ്ട്. തുടർന്ന് ശ്രീകോവിലിൽ മേൽശാന്തി വടക്കേൽ ഇല്ലം നാരായണൻ നമ്പൂതിരിയുടെ മുഖ്യകാർമ്മികത്വത്തിൽ നാണയപൂജ നടത്തും. തുടർന്ന് നാണയങ്ങൾ ഉമാമഹേശ്വരൻമാരുടെ കൈനീട്ടമായി ഭക്തർക്ക് വിതരണം ചെയ്യും. മുൻവർഷം കൈനീട്ടമായി ലഭിച്ച നാണയങ്ങൾ ഭക്തർ ക്ഷേത്രഭണ്ഡാരത്തിൽ തിരികെ സമർപ്പിക്കുകും ചെയ്യും.
വിഷുനാളിൽ ഓറഞ്ച്, ആപ്പിൾ, മുന്തിരി, അവൽ, മലർ, കൽക്കണ്ടം, ശർക്കര, ചെറുപഴം തുടങ്ങിയവ ചേർത്ത് മധുരഫല മഹാനിവേദ്യവും അവൽ നിവേദ്യവും ഭക്തർക്ക് വിതരണം ചെയ്യും. വിഷുപായസ വിതരണവുമുണ്ട്. ഇതിനായി മുൻകൂർ ബുക്ക് ചെയ്യണം. വൈകിട്ട് വിഷു വിളക്കും വിശേഷാൽ ദീപാരാധനയും നടക്കും.
തോടനാൽ മനക്കുന്ന് ദേവീക്ഷേത്രത്തിൽ നാളെ പുലർച്ചെ 5ന് ഗണപതി ഹോമം, 10 ന് നാരങ്ങാവിളക്ക് ഘോഷയാത്ര, 6.45 ന് വിശേഷാൽ ദീപാരാധന, നൃത്തം എന്നിവ നടക്കും.

ഐങ്കൊമ്പ് പാറേക്കാവ് ഭദ്രകാളി ക്ഷേത്രത്തിൽ വിഷുക്കണി ദർശനവും വിശേഷാൽ പൂജകളും പുലർച്ചെ 5 മുതൽ നടക്കും.

പാലാ ളാലം മഹാദേവക്ഷേത്രം, പൂവരണി മഹാദേവക്ഷേത്രം, അമ്പലപ്പുറത്ത് ഭഗവതി ക്ഷേത്രം, കുമ്മണ്ണൂർ നടയ്ക്കാംകുന്ന് ഭഗവതിക്ഷേത്രം, രാമപുരം ശ്രീരാമസ്വാമി ക്ഷേത്രം, വെള്ളിലാപ്പള്ളി കാർത്യായനി ദേവീക്ഷേത്രം, അളനാട് ശ്രീകൃഷ്ണസ്വാമി ക്ഷേത്രം, വെള്ളാപ്പാട് ഭഗവതിക്ഷേത്രം, കടപ്പാട്ടൂർ മഹാദേവക്ഷേത്രം, തൃക്കയിൽ മഹാദേവക്ഷേത്രം, പോണാട്കാവ് ക്ഷേത്രം, കിടങ്ങൂർ ശ്രീസുബ്രഹ്മണ്യസ്വാമി ക്ഷേത്രം എന്നിവിടങ്ങളിലും വിശേഷാൽ വിഷുദിന പൂജകൾ നടത്തും.