കൊടിയേറ്റ് 28ന് വൈകിട്ട് 7.45നും 8.30നും മദ്ധ്യേ

ചങ്ങനാശേരി: തൃക്കൊടിത്താനം ശ്രീഗുരുഗുഹാനന്ദപുരം ക്ഷേത്രത്തിലെ ഉത്സവം എസ്.എൻ.ഡി.പി യോഗം 59, 1348, 1349 ാം നമ്പർ ശാഖകളുടെ നേതൃത്വത്തിൽ 28ന് ആരംഭിച്ച് മേയ് 5 ന് സമാപിക്കും. 28ന് വൈകിട്ട് 7.45നും 8.30നും മദ്ധ്യേ എരമല്ലൂർ ഉഷേന്ദ്രൻ തന്ത്രിയുടെ മുഖ്യകാർമ്മികത്വത്തിലും, ക്ഷേത്രം മേൽശാന്തി ഉല്ലല കണ്ണൻ ശാന്തിയുടെ സഹകാർമ്മികത്വത്തിലുമാണ് കൊടിയേറ്റ്. കൊടിക്കൂറയും, കൊടിക്കയറും ഉച്ചകഴിഞ്ഞ് 3.30ന് പതിനെട്ടിൽ വീട്ടിൽ രജനിയുടെ വസതിയിൽ നിന്നും ആരംഭിച്ച് വാദ്യമേളങ്ങളടേയും താലപ്പൊലിയുടേയും അകമ്പടിയോടുകൂടി മുക്കാട്ടുപടിവഴി ക്ഷേത്രത്തിൽ എത്തിച്ചേർന്ന ശേഷമാണ് കൊടിയേറ്റ്. തുടർന്ന്, ആകാശവിസ്മയം, അങ്കുരാർപ്പണം, കൊടിയേറ്റ് സദ്യ, ശ്രീഭൂതബലി, വിളക്കിനെഴുന്നള്ളിപ്പ്, മംഗളപൂജ എന്നിവ നടക്കും.

29ന് വൈകിട്ട് 7ന് നടക്കുന്ന സമ്മേളനം ചങ്ങനാശേരി യൂണിയൻ പ്രസിഡന്റ് ഗിരീഷ് കോനാട്ട് ഉദ്ഘാടനം ചെയ്യും. ക്ഷേത്ര യോഗം പ്രസിഡന്റ് എം.വി.സുകുമാരൻ അദ്ധ്യക്ഷത വഹിക്കും. കുറിച്ചി അദ്വൈതവിദ്യാശ്രമം സെക്രട്ടറി സ്വാമി കൈവല്ല്യാനന്ദ സരസ്വതി അനുഗ്രഹപ്രഭാഷണം നടത്തും. യൂണിയൻ വൈസ് പ്രസിഡന്റ് പി.എം ചന്ദ്രൻ മുഖ്യപ്രഭാഷണവും, സെക്രട്ടറി സുരേഷ് പരമേശ്വരൻ അവാർഡ് വിതരണവും നിർവഹിക്കും. കോലേട്ട് കെ.എ തോമസുകുട്ടി വിദ്യാഭ്യാസ കാഷ് അവാർഡ് സമർപ്പിക്കും. ഉത്സവ കമ്മിറ്റി ചെയർമാൻ സി.ജി.പവിത്രൻ, 59ാം നമ്പർ ശാഖ പ്രസിഡന്റ് എ.ജി.ഷാജി, 1348ാം നമ്പർ ശാഖ പ്രസിഡന്റ് അശോക് കുമാർ, 1349-ാം നമ്പർ ശാഖ വൈസ് പ്രസിഡന്റ് എ.പി.രാജൻ, സെക്രട്ടറിമാരായ കെ.എസ്.ഷാജി, രതീഷ്, റ്റി.ആനന്ദൻ, എം.സുഭാഷ് തുടങ്ങിയവർ പങ്കെടുക്കും. 30ന് വൈകിട്ട് 7ന് ശ്രീശാരദകുമാരി സംഘത്തിന്റെ ഭജൻസ്. മേയ് 1ന് ദേവനടനവും, 2ന് ഹിഡുംബൻപൂജയും, തുടർന്ന് 59 ാം നമ്പർ ശാഖയിലെ വനിതകളുടെ തിരുവാതിരയും നൃത്തസന്ധ്യയും. മേയ് 3ന് വൈകിട്ട് 5.30ന് താലപ്പൊലി ഘോഷയാത്ര. രാത്രി 8ന് ഘോഷയാത്ര കുന്നുംപുറത്ത് എത്തിച്ചേരും. തുടർന്ന് ഗുരു ഗുഹാനന്ദപുരം ക്ഷേത്രത്തിൽ വരവേൽപ്പ്. മേയ് 5 ന് ആറാട്ട്. വൈകിട്ട് 7ന് ഗാനമേള, സുവർണ്ണ ഗീതങ്ങൾ എന്നീ പരിപാടികളോടെ ഉത്സവ ആഘോഷം സമാപിക്കുമെന്ന് ക്ഷേത്രയോഗം ഭാരവാഹികളായ പ്രസിഡന്റ് എം.വി.സുകുമാരൻ, സെക്രട്ടറി കെ.രാധാക്യഷ്ണൻ, ഖജാൻജി എം.സുഭാഷ്, ഉത്സവ കമ്മറ്റി ചെയർമാൻ സി.ജി.പവിത്രൻ എന്നിവർ അറിയിച്ചു.