ചില കാര്യങ്ങൾ നമുക്ക് മറ്റൊരാളെ എഴുതി അറിയിക്കാനാവില്ല. പ്രത്യേകിച്ച് വൈകാരികമായ സംഭവങ്ങൾ. ഏതൊക്കെ രീതിയിൽ ഭാഷ പ്രയോഗിച്ചാലും വായിക്കുന്ന ആൾക്ക് അത് കൃത്യമായി മനസ്സിലായിക്കൊള്ളണമെന്നില്ല. ഇത്തരം വൈകാരികമായ സംഭവവികാസങ്ങൾ നാം നേരിട്ട് പറഞ്ഞു തന്നെ അറിയിക്കണം. ഈ ഉദ്ദേശത്തോടു കൂടിയാണ് 2013 ൽ വാട്സാപ്പ് വോയിസ് മെസേജ് എന്ന ഫീച്ചർ അവതരിപ്പിച്ചത്. ഇന്ന് ദിവസേന ശരാശരി 700 കോടി വോയിസ് മെസേജുകളാണ് വാട്സാപ്പ് വഴി പങ്കുവയ്ക്കപ്പെടുന്നത്. ഈ ഫീച്ചറിന് ചില പോരായ്മകൾ നിലവിലുണ്ടായിരുന്നു. ആ പോരായ്മകളെല്ലാം പരിഹരിച്ച് വാട്സാപ്പ് പുതിയ അപ്‌ഡേറ്റ് പുറത്തിറക്കിയിരിക്കുന്നു.

വോയിസ് മെസേജുകളുമായി ബന്ധപ്പെട്ട പുതിയ ആറ് ഫീച്ചറുകളാണ് വാട്സാപ്പ് ഇപ്പോൾ അവതരിപ്പിച്ചിരിക്കുന്നത്. വോയിസ് മെസേജ് അയക്കുന്നതിനും മറ്റൊരാൾ അയച്ച വോയിസ് കേൾക്കുന്നതിനും കൂടുതൽ സൗകര്യങ്ങൾ നൽകുന്നതാണ് പുതിയ അപ്‌ഡേറ്റ്.

1. ഔട്ട് ഓഫ് ചാറ്റ് പ്ലേ ബാക്ക്

ഒരാൾ അയച്ച വോയിസ് മെസേജ് കേൾക്കണമെങ്കിൽ അയാളുടെ ചാറ്റ് ബോക്സിൽ തന്നെ നിൽക്കണമെന്ന നിബന്ധന മുമ്പ് ഉണ്ടായിരുന്നു. ഈ നിബന്ധന ഇപ്പോൾ നീക്കിയിട്ടുണ്ട്. ഒരാളുടെ വോയിസ് മെസേജ് കേട്ടു കൊണ്ടിരിക്കുമ്പോൾ തന്നെ ആ ചാറ്റിൽ നിന്ന് പുറത്ത് കടന്ന് മറ്റൊരാളുടെ ചാറ്റ് ബോക്സിലേക്ക് പോയി അയാളോട് ചാറ്റ് ചെയ്യാൻ ഈ അപ്‌ഡേറ്റ് വഴി സാധിക്കും. ടെലഗ്രാമിൽ ഈ ഫീച്ചർ നേരത്തേ തന്നെ ലഭ്യമാണ്.

2. പോസ്/ റസ്യൂം റെക്കോഡിംഗ്

ഒരു വോയിസ് മെസേജ് റെക്കോഡ് ചെയ്യുന്നതിന് ഇടയ്ക്ക് വെച്ച് റെക്കോഡിംഗ് നിർത്താനും അത് കട്ടാവാതെ തന്നെ വീണ്ടും പുനരാരംഭിക്കാനും ഇനി സാധിക്കും. റെക്കോഡ് ചെയ്യുന്നതിനിടെ സംശയമോ എന്തെങ്കിലും തടസങ്ങളോ ഉണ്ടാവുകയാണെങ്കിൽ മെസേജ് ആദ്യം മുതൽ വീണ്ടും റെക്കോഡ് ചെയ്യേണ്ടതില്ല.

3. വേവ് ഫോം വിഷ്വലൈസേഷൻ

ശബ്ദസന്ദേശം ഇനി മുതൽ തരംഗരൂപത്തിൽ ദൃശ്യമാവും. വോയിസ് കേട്ടുകൊണ്ടിരിക്കുമ്പോൾ തന്നെ ശബ്ദത്തിന്റെ തീവ്രത എത്രത്തോളമാണെന്ന് മനസ്സിലാക്കാൻ ഇതു വഴി സാധിക്കും.

4. ഡ്രാഫ്റ്റ് പ്രിവ്യു

മൈക്ക് ബട്ടനിൽ അമർത്തി വെച്ചോ, മൈക്ക് ലോക്ക് ആക്കിയോ റെക്കോഡ് ചെയ്യുന്ന സന്ദേശം റെക്കോഡിംഗ് കഴിഞ്ഞയുടൻ സെൻഡ് ആവുന്നതായിരുന്നു ഇതുവരെയുള്ള രീതി. റെക്കോഡ് ചെയ്തതിൽ എന്തെങ്കിലും തെറ്റുണ്ടോ എന്ന് ഉപയോക്താവിന് അറിയാൻ സാധിക്കില്ലായിരുന്നു. എന്നാൽ ആ പ്രശനം ഇനിയുണ്ടാകില്ല. റെക്കോഡ് ചെയ്ത വോയിസ് സന്ദേശം അയയ്ക്കുന്നതിന് മുമ്പ് കേട്ടു നോക്കാൻ പുതിയ അപ്‌ഡേറ്റ് അനുവധിക്കും.

5. റിമെമ്പർ പ്ലേബാക്ക്

ഒരാളുടെ സന്ദേശം കേൾക്കുന്നതിനിടയ്ക്ക് വെച്ച് നിർത്തേണ്ടി വന്നാലും ഇനി അതോർത്ത് ടെൻഷൻ അടിക്കണ്ട. ചാറ്റിന് പുറത്തു പോയാലും എവിടം വരെയാണോ കേട്ടു നിർത്തിയത് അവിടം മുതൽ വീണ്ടും തുടർന്ന് കേൾക്കാം.

6. പ്ലേബാക്ക് സ്പീഡ്

ശബ്ദ സന്ദേശത്തിന്റെ വേഗത കൂട്ടി കേൾക്കാൻ ഉപയോക്താവിന് സൗകര്യമൊരുക്കുന്നതാണ് ഈ ഫീച്ചർ. സന്ദേശം 1.5, 2 ഇരട്ടി വരെ വേഗത്തിൽ കേൾക്കാനാകും.

വരുന്ന ആഴ്ചകളിൽ വാട്സാപ്പ് അപ്‌ഡേറ്റ് ചെയ്യുക വഴി ഈ സൗകര്യങ്ങൾ എല്ലാവർക്കും ലഭിക്കും.