ന്യൂഡൽഹി: ഇന്ധനവില വർദ്ധനയ്ക്ക് ഞായറാഴ്‌ചയും അവധിയില്ല. നാളെയും പെട്രോൾ. ഡീസൽ വില വർദ്ധിക്കും. ഒരു ലിറ്റർ ഡീസലിന് 85 പൈസയാണ് ഉയർത്തുന്നതെന്ന് എണ്ണക്കമ്പനികൾ വ്യക്തമാക്കി. പെട്രോൾ ലിറ്ററിന് 87 പൈസ കൂടും. പത്ത് ദിവസത്തിനിടെ പെട്രോളിന് കൂടിയത് 8 രൂപ 71 പൈസയാണ്. ഡീസലിന് 8 രൂപ 42 പൈസയും കൂട്ടി. ഇതോടെ കൊച്ചിയിൽ പെട്രോളിന് 113.02രൂപയും ഡീസലിന് 99.89 രൂപയുമാണ് വില.

തിരുവനന്തപുരത്ത് 100 കടന്ന ഡീസൽ വില നാളെ 101 രൂപയിലധികമാകും. തലസ്ഥാനത്തെ പെട്രോൾ വില നിലവിൽ 114 രൂപ 14 പൈസ എന്ന നിലയിലാണ്. കോഴിക്കോട് പെട്രോളിന് ഇന്ന് 112 രൂപ 32 പൈസയും ഡീസലിന് 99 രൂപ 31 പൈസയുമാണ് വില.

.ഇന്നലെയും രാജ്യത്ത് ഇന്ധനവില വ‍ർധിപ്പിച്ചിരുന്നു. പെട്രോള്‍ ലിറ്ററിന് 87 പൈസയും ഡീസലിന് 84 പൈസയുമാണ് ഇന്നലെ കൂട്ടിയത്. അഞ്ച് സംസ്ഥാനങ്ങളിലെ തിരഞ്ഞെടുപ്പിനെത്തുടർന്ന് കഴിഞ്ഞ നാല് മാസമായി ഇന്ധന വില വർധിപ്പിച്ചിരുന്നില്ല. ഫല പ്രഖ്യാപനത്തിന് പിന്നാലെ ഇന്ധന വില കുത്തനെ ഉയരുമെന്ന് റിപ്പോർട്ടുകളുണ്ടായിരുന്നെങ്കിലും ഒരാഴ്ച കഴിഞ്ഞതോടെയാണ് എണ്ണക്കമ്പനികൾ വീണ്ടും വില വർധിപ്പിച്ച് തുടങ്ങിയത്.