മലയാള സിനിമയിൽ ചുരുക്കം ചില കഥാപാത്രങ്ങളിലൂടെ ആസ്വാദകർക്ക് പ്രിയങ്കരനായിരുന്ന കൈനകരി തങ്കരാജ് വിടവാങ്ങുമ്പോൾ നാടകലോകത്തെ അതികായനെ കൂടിയാണ് നഷ്ടപ്പെടുന്നത്. അദ്ദേഹം അവിസ്മരണീയമാക്കിയ 'ഈ മ യൗ'വിലെ വാവച്ചൻ മേസ്തിരി ഇന്നും പ്രേക്ഷകരുടെ മനസിൽ ഒരു വിങ്ങലാണ് ലിജോ ജോസ് പെല്ലിശ്ശേരിയുടെ സംവിധാനത്തിലൊരുങ്ങിയ ചിത്രത്തിന്റെ കേന്ദ്ര ബിന്ദു തങ്കരാജ് ആണ്. ഇപ്പോൾ അദ്ദേഹത്തിന് ആദരമർപ്പിച്ച് കൊണ്ട് 'ഓൾഡ്മങ്ക്സ് ഡിസൈൻസ് പുറത്തു വിട്ട വീഡിയോ ആണ് സോഷ്യൽ മീഡിയയിൽ ചർച്ചയാകുന്നത്.
'ഈ മ യൗ'വിന്റെ ടൈറ്റിലിൽ കാണുന്ന തങ്കരാജിന്റെ മുഖം ഒരുക്കുന്നതിന്റെ വീഡിയോ ആണ് 'ഓൾഡ്മങ്ക്സ് ഡിസൈൻസ്' പുറത്തു വിട്ടിരിക്കുന്നത്. ടൈറ്റിലിൽ കാണുന്ന മുഖം ഒരുക്കാൻ വേണ്ടി മാത്രം മണിക്കൂറുകളുടെ തയ്യാറെടുപ്പുകളാണ് എടുത്തത്.
ഇന്ന് ഉച്ചതിരിഞ്ഞ് കേരളപുരത്തെ സ്വവസതിയിൽ വെച്ചായിരുന്നു കൈനകരി തങ്കരാജിന്റെ മരണം. കരൾ രോഗബാധയെ തുടർന്ന് ഏറെ നാളായി ചികിത്സയിലായിരുന്നു. സംസ്കാരം നാളെ രാവിലെ 9 ന് വീട്ടുവളപ്പിൽ നടക്കും. പ്രശസ്ത നാടക പ്രവര്‍ത്തകന്‍ കൃഷ്ണന്‍കുട്ടി ഭാഗവതരുടെ മകനാണ്.10,000 വേദികളില്‍ പ്രധാന വേഷങ്ങളില്‍ തിളങ്ങിയ അപൂര്‍വ്വം നാടകനടന്മാരില്‍ ഒരാളായ തങ്കരാജ്, കെഎസ്ആര്‍ടിസിയിലെയും കയര്‍ ബോര്‍ഡിലെയും ജോലി ഉപേക്ഷിച്ചായിരുന്നു അഭിനയത്തിലേക്ക് കടന്നുവന്നത്.പ്രേം നസീര്‍ നായകനായി എത്തിയ ആനപ്പാച്ചന്‍ ആയിരുന്നു ആദ്യ ചിത്രം. 35 ഓളം ചിത്രങ്ങളില്‍ അഭിനയിച്ചിട്ടുണ്ട്. അച്ചാരം അമ്മിണി ഓശാരം ഓമന, ഇതാ ഒരു മനുഷ്യന്‍, എന്നീ ചിത്രങ്ങൾക്ക് പുറമെ, അണ്ണന്‍ തമ്പി, ലൂസിഫർ, ഈ മ യൗ, ആമേന്‍, ഹോം എന്നീ ചിത്രങ്ങളിലെ കഥാപാത്രങ്ങളും ഏറെ ശ്രദ്ധിക്കപ്പെട്ടിരുന്നു.