ന്യൂഡൽഹി: ചരിത്രത്തിലെ തന്നെ ഏറ്റവും വലിയ വെല്ലുവിളിയിലൂടെയാണ് കോൺഗ്രസ് ഇപ്പോൾ കടന്നുപോകുന്നതെന്ന് പാർട്ടി അദ്ധ്യക്ഷ സോണിയ ഗാന്ധി. മുന്നിലുള്ള വഴികൾ പലതും കടുത്ത വെല്ലുവിളികൾ നിറഞ്ഞതാണെന്നും പാർട്ടിയുടെ ചെറുത്തുനിൽപ്പ് പോലും ഇപ്പോൾ കനത്ത പരീക്ഷണമാണെന്നും അവർ വ്യക്തമാക്കി. പാർലമെന്ററി പാർട്ടി യോഗത്തിലാണ് സോണിയ ഗാന്ധി കോൺഗ്രസിന്റെ നിലവിലെ അവസ്ഥയെ കുറിച്ച് വിശദീകരിച്ചത്.

' സമീപകാല തിരഞ്ഞെടുപ്പ് ഫലങ്ങളിൽ നിങ്ങൾ എത്രമാത്രം നിരാശനാണെന്ന് എനിക്ക് അറിയാം. അഞ്ച് സംസ്ഥാനങ്ങളിലെ തോൽവി ഞെട്ടിക്കുന്നതും വേദനയുണ്ടാക്കുന്നതുമാണ്. പാർട്ടി പുനരുജ്ജീവനം സമൂഹം പോലും ആവശ്യപ്പെടുന്നുണ്ട്. അത് നമ്മുടെ ജനാധിപത്യത്തിനും നമ്മുടെ സമൂഹത്തിനും അത്യന്താപേക്ഷിതമാണ്.

പാർട്ടിയെ ശാക്തീകരിക്കാൻ നിരവധി നിർദേശങ്ങൾ ഉയർന്നിട്ടുണ്ട്. സംഘടനയുടെ എല്ലാ തലത്തിലും ഐക്യം പ്രധാനമാണ്. ചിന്തൻ ശിബിർ ഉടൻ ചേരും. അവിടെയാണ് സഹപ്രവർത്തകരുടെയും പാർട്ടി പ്രതിനിധികളുടെയും കൂടുതൽ അഭിപ്രായങ്ങൾ കേൾക്കാൻ കഴിയുന്നതെന്നും സോണിയ ഗാന്ധി പറഞ്ഞു.