ഇന്നലെ ലോക ആരോഗ്യ ദിനമായിരുന്നു. അതേസമയം കേരള രാഷ്ട്രീയത്തിൽ അതിനേക്കാളേറെ പ്രാധാന്യമുള്ള ദിവസവും. പ്രത്യേകിച്ച് കോൺഗ്രസിന്. മുതിർന്ന നേതാവായ കെ വി തോമസ്, പാർട്ടി വിലക്ക് ലംഘിച്ച് കണ്ണൂരിൽ നടക്കുന്ന സിപിഎം പാർട്ടി കോൺഗ്രസിൽ പങ്കെടുക്കുമോ ഇല്ലയോ എന്നതായിരുന്നു ഇന്നലെ 11 മണി വരെയുള്ള ചർച്ച. 11 മണിയോടെ കെ വി തോമസ് തന്നെ ഇക്കാര്യം വ്യക്തമാക്കുമെന്ന് നേരത്തെ അറിയിച്ചിരുന്നു. എല്ലാ കോൺഗ്രസ് പ്രവർത്തകരും രാവിലെ മുതൽ കെ വി തോമസിന്റെ പ്രതികരണത്തെ ആകാംക്ഷയോടെ കാത്തിരിക്കുകയായിരുന്നു. കോൺഗ്രസിനെ

എന്നാൽ അതിനേക്കാളൊക്കെ പ്രാധാന്യമുള്ളതാണ് ആരോഗ്യം എന്ന നിലപാടിലായിരുന്നു മറ്റൊരു മുതിർന്ന കോൺഗ്രസ് നേതാവ്. മറ്റാരുമല്ല കെപിസിസി അദ്ധ്യക്ഷൻ സാക്ഷാൽ കെ സുധാകരൻ തന്നെ. പതിവു പോലെ തന്നെ ഇന്നലെയും രാവിലെ അദ്ദേഹം തന്റെ വ്യായാമത്തിൽ മുഴുകി. കോൺഗ്രസ് പാർട്ടിയിൽ നിന്ന് പാർട്ടി കോൺഗ്രസിലേക്കുള്ള കെ വി തോമസിന്റെ, യാത്രയൊന്നും തന്നെ ബാധിക്കില്ല എന്ന ഭാവത്തോടെയാണ് അദ്ദേഹം വ്യായാമം ചെയ്യുന്നത്.

ഇനി എന്തൊക്കെ വലിയ കാര്യങ്ങൾ വന്നാലും ശരി അതൊന്നും തന്റെ ദിനചര്യകളെ ബാധിക്കില്ല എന്ന മട്ടിലുള്ള അദ്ദേഹത്തിന്റെ വ്യായാമ വീഡിയോ സമൂഹ മാദ്ധ്യമങ്ങളിൽ പലരും പങ്കു വയ്ക്കുന്നുണ്ട്. എത്ര തിരക്കായാലും കൃത്യനിഷ്ഠയോടെ വ്യായാമം ചെയ്യുന്ന കെ എസ് നമ്മൾ ഓരോരുത്തർക്കും പ്രചോദനമാണ് എന്ന തലക്കെട്ടോടെയാണ് പലരും വീഡിയോ പോസ്റ്റു ചെയ്തത്.

ഫിറ്റ്‌നെസിന്റെ കാര്യത്തിൽ വളരെ ശ്രദ്ധ ചെലുത്തുന്ന വ്യക്തിയാണ് കെ സുധാകരൻ. പാർട്ടിയിലെ കരുത്തനായ നേതാവ് എന്ന് അണികൾ പറയുന്നതിന്റെ രഹസ്യവും ദിവസേനയുള്ള ഈ വ്യായാമം തന്നെയാണ്. കൃത്യമായുള്ള വ്യായാമം മുടങ്ങാതിരിക്കാൻ സ്വന്തം വീട്ടിൽ തന്നെ അദ്ദേഹം ഒരു ജിംനേഷ്യം സെറ്റ് ചെയ്തിട്ടുണ്ട്. മനസ്സിന് ആരോഗ്യം വേണമെങ്കിൽ ശരീരത്തിന് ആരോഗ്യം വേണമെന്നാണ് സുധാകരന്റെ വാദം. ആരോഗ്യമാണ് ഏറ്റവും വലിയ ധനം. വ്യായാമം മാത്രമല്ല യോഗയും അദ്ദേഹത്തിന്റെ ദിനചര്യയുടെ ഭാഗമാണ്. എത്ര തിരക്കിനിടയിലും വ്യായാമത്തിനായി അദ്ദേഹം ഒരു മണിക്കൂർ മാറ്റി വയ്ക്കാറുണ്ട്.