ലക്നൗ: ജയിലുകളിൽ തടവുകാരുടെ മനസമാധാനത്തിനും അന്തരീക്ഷം ശുദ്ധമാക്കാനും ഗായത്രീ മന്ത്രവും മഹാമൃത്യുഞ്ജയവും കേൾപ്പിക്കുമെന്ന് ഉത്തർ പ്രദേശ് ജയിൽ മന്ത്രി ധർമ്മവീർ പ്രജാപതി. തടവുകാർക്ക് ആത്മീയമായ സൗഖ്യം ഉണ്ടാക്കാനും അവരെ നല്ല പൗരന്മാരാക്കാനും ഇതുകൊണ്ട് കഴിയുമെന്നാണ് മന്ത്രിയുടെ കണക്കുകൂട്ടൽ.
ഭാരതം ഒരു സനാതന രാജ്യമായതിനാൽ ആത്മീയമായ ജപവും കഥകളും പ്രാർത്ഥനയുമൊക്കെ ജയിൽ അന്തരീക്ഷത്തെ ശുദ്ധമാക്കുമെന്നാണ് മന്ത്രി വിശ്വസിക്കുന്നത്. ആത്മീയ മേഖലയിലെ ഉന്നതരുടെയും സന്യാസിമാരുടെയും പ്രഭാഷണങ്ങൾ ഇവിടെ കേൾപ്പിക്കാനും സർക്കാർ പദ്ധതിയിടുന്നതായി മന്ത്രി അഭിപ്രായപ്പെട്ടെന്ന് ഒരു ദേശീയ മാദ്ധ്യമം റിപ്പോ‌ർട്ട് ചെയ്യുന്നു.
സർക്കാർ ഉത്തരവ് വന്നില്ലെങ്കിലും ജയിലുകളിൽ ഈ മന്ത്രങ്ങളും പ്രാർത്ഥനകളും പതിവുണ്ട്. ഇതുൾപ്പടെ ഒരുപിടി പുതിയ പരിഷ്‌കാരങ്ങൾ ജയിലിൽ നടപ്പാക്കാൻ യോഗി സർക്കാർ തീരുമാനിച്ചതായാണ് വിവരം. രാജ്യത്തെ നാഷണൽ ക്രൈം റെക്കോർഡ്‌സ് ബ്യൂറോ കണക്ക് പ്രകാരം ഏറ്റവുമധികം തടവുകാരുള‌ള ഇന്ത്യയിലെ സംസ്ഥാനം യുപിയാണ്.