അന്തിക്കാട്:സത്യൻ അന്തിക്കാട് പുതിയ സിനിമയുടെ തിരക്കുകൾ ഒഴിഞ്ഞ് വീണ്ടും വീട്ടുകാര്യങ്ങളിൽ മുഴുകിയിരിക്കുമ്പോഴാണ് സുരേഷ് ഗോപിയുടെ അപ്രതീക്ഷിത വരവ്; വിഷുക്കൈനീട്ടവും വിഷുപ്പുടവയുമായി. ഇങ്ങനെയൊരു സമ്മാനം ആദ്യമായാണെന്ന് പറഞ്ഞ സത്യൻ അന്തിക്കാട്, സുരേഷ് ഗോപിയെ ആശ്ളേഷിച്ചു.

ഓർമ്മകൾ പിന്നിലേക്ക് പോയപ്പോൾ,പരസ്പരം പങ്കുവച്ചത്, ചെന്നൈ ജെമിനി സ്റ്റുഡിയോയുടെ പരിസരങ്ങളിൽ ഒരുമിച്ച് കറങ്ങി നടന്നതും ചെറിയ കടകളിൽ നിന്ന് പാനീയം വാങ്ങിക്കഴിച്ചതും അടക്കമുള്ള ആദ്യകാല സിനിമാസ്മരണകൾ.

സത്യൻ അന്തിക്കാടിന്റെ ഭാര്യ നിമ്മി, മകനും സംവിധായകനുമായ അനൂപ് സത്യൻ എന്നിവരോടും സുരേഷ് ഗോപി വീട്ടുവിശേഷങ്ങൾ ചോദിച്ചു. രാഷ്ട്രീയമായാലും സിനിമയായാലും കള്ളത്തരം കാട്ടാത്ത സുരേഷ് ഗോപിയോട്, എന്നും അതൊരു കൈമുതലായിരിക്കണമെന്ന് സത്യൻ പറഞ്ഞു.

രാഷ്ട്രീയത്തിന് അതീതമായി ജനങ്ങളെ കോർത്തിണക്കി അദ്ദേഹത്തിന് പ്രവർത്തിക്കാനാകുമെന്നാണ് പ്രതീക്ഷയെന്ന് സത്യൻ അന്തിക്കാട് കേരള കൗമുദിയോട് പറഞ്ഞു. ബി.ജെ.പിയോടോ കോൺഗ്രസിനോടോ സി.പി.എമ്മിനോടോ അമിതമായ താൽപര്യം ഇല്ല. നല്ല വ്യക്തി എന്ന നിലയിലാണ് സുരേഷ് ഗോപിയെക്കുറിച്ച് പറയുന്നതെന്നും സത്യൻ അന്തിക്കാട് വ്യക്തമാക്കി. രാവിലെ ഒൻപതു മണിയോടെ എത്തിയ സുരേഷ് ഗോപി ഒരു മണിക്കൂറോളം സുഹൃത്തിനൊപ്പം ചെലവഴിച്ചു.

ഈ മാസം 29 ന് കുടുംബപ്രേക്ഷകരിലേക്ക് എത്തുന്ന സത്യൻ അന്തിക്കാടിന്റെ പുതിയ സിനിമ 'മകൾ' വലിയ വിജയമാകട്ടെ എന്ന് ആശംസിച്ചാണ് മടങ്ങിയത്. ബി.ജെ.പിയുടെ ജില്ലാ നേതാക്കൾ കൂടെയുണ്ടായിരുന്നു.