ഭോപ്പാൽ: മദ്ധ്യപ്രദേശിൽ അമിതാബ് ബച്ചന്റെയും അക്ഷയ് കുമാറിന്റെയും കോലം കത്തിച്ച് കോൺ​ഗ്രസിന്റെ പ്രതിഷേധം. പണ്ട് കോൺഗ്രസ് ഭരിച്ചിരുന്നപ്പോൾ ഇന്ധന വില വർദ്ധനവിനെതിരെ നിരന്തരം രം​ഗത്ത് വന്നിരുന്ന ഇരുവരും മൗനത്തിലാണെന്ന് ആരോപിച്ചാണ് കോലം കത്തിച്ചത്.

ബിജെപി ഭരിക്കുമ്പോൾ ഇന്ധന വില കുത്തനെ കൂടുന്നതിനെക്കുറിച്ച് ഇവർ ഒരക്ഷരം മിണ്ടുന്നില്ലെന്നാണ് കോൺഗ്രസ് പറയുന്നത്. 2012 ൽ ഈ ന‌‌ടൻമാർ ഇന്ധന വില വർദ്ധനവിനെതിരെയും വിലക്കയറ്റത്തിനുമെതിരെയും ട്വീറ്റ് ചെയ്യുമായിരുന്നുവെന്ന് കോലം കത്തിക്കലിന് നേതൃത്വം നൽകിയ കോൺ​ഗ്രസ് എം എൽ എ പി.സി ശർമ പറഞ്ഞു.

വാഹനം വാങ്ങാനാകും പക്ഷെ പെട്രോളും ഡീസലും വാങ്ങാനായി ലോൺ വേണ്ടി വരും എന്നായിരുന്നു ഈ നടന്മാർ പറഞ്ഞത്. അന്ന് ​എൽപിജി സിലിണ്ടറുകളുടെ വില 300-400 രൂപയായിരുന്നു. പെട്രോൾ, ഡീസൽ വില ​60 രൂപയോളവും. ഇപ്പോൾ എൽപിജി സിലിണ്ടറുകൾക്ക് 1000 രൂപയിലാണ്.

പെട്രോൾ-ഡീസൽ വിലയ്ക്ക് 100-120 രൂപയിലെത്തി. ഈ അവസരത്തിലും അമിതാബ് ബച്ചനും അക്ഷയ് കുമാറും ഒന്നും മിണ്ടുന്നില്ലെന്ന് എം എൽ എ ആരോപിച്ചു. ഇവർക്ക് സാധാരണക്കാരന്റെ കാര്യത്തിൽ ഒരു ആശങ്കയുമില്ലെന്നും അദ്ദേഹം കൂട്ടിച്ചേർത്തു.