തിരുവനന്തപുരം: തദ്ദേശ സ്വയംഭരണ സ്ഥാപനങ്ങളിലെ പൊതുമരാമത്ത് പ്രവൃത്തികളുടെ നിർവഹണം സുതാര്യവും അഴിമതി വിമുക്തവുമാക്കുന്നതിനുള്ള പ്രൈസ് ത്രീ സോഫ്‌റ്റ്‌വെയറിന്റെ ഭാഗമായി ഇഎംബുക്ക് സംവിധാനം നടപ്പിലാക്കുന്നു. ഇതിനായി ഉദ്യോഗസ്ഥർക്ക് ടാബ്‌ലെറ്റ് കംപ്യൂട്ടർ വിതരണം ചെയ്യുമെന്ന് തദ്ദേശസ്വയംഭരണ് മന്ത്രി എം.വി.ഗോവിന്ദൻ മാസ്റ്റർ പറഞ്ഞു.

കമ്പ്യൂട്ടറുകളുടെ വിതരണവും തദ്ദേശസ്വയംഭരണ വകുപ്പിന്റെ ആസ്ഥാനമന്ദിരമായ സ്വരാജ് ഭവനിലെ സ്വരാജ് ഹാൾ ഉദ്ഘാടനവും 12ന് രാവിലെ 10:30ന് മന്ത്രി നിർവഹിക്കും. പൊതുമരാമത്ത് പ്രവൃത്തിയുടെ അളവുകൾ ഓൺലൈനായി രേഖപ്പെടുത്തുന്നതിലൂടെയും ഫയലുകൾ കൈകാര്യം ചെയ്യുന്നതിലുള്ള സുതാര്യതയിലൂടെയും അഴിമതി നിർമ്മാർജ്ജനം ചെയ്യാൻ സാധിക്കും. പ്രവൃത്തികളുടെ ബില്ലുകൾ സമയബന്ധിതമായ തയ്യാറാക്കി നൽകുന്നതിനും സോെ്രഫ്ര്വയർ ഉപകാരപ്രദമാകും. വകുപ്പിൽ ഘട്ടംഘട്ടമായാണ് സോഫ്‌റ്റ്‌വെയർ സേവനം പൂർണമാക്കുക.

ഇലക്ട്രോണിക് മെഷർമെന്റ് ബുക്ക് ഉൾപ്പെടുന്ന പ്രൈസ് ത്രീ നടപ്പിലാക്കുന്നതോടെ തദ്ദേശ സ്വയംഭരണ എൻജിനിയറിംഗ് വിഭാഗത്തിന്റെ കാര്യക്ഷമത വർധിക്കും. പ്രവൃത്തികളുടെ ബിൽ സമയബന്ധിതമായി കരാറുകാർക്ക് ലഭ്യമാവുകയും ചെയ്യും. ആദ്യഘട്ടത്തിൽ സംസ്ഥാനത്തെ ആറ് ജില്ലകളിലാണ് എൻജിനിയർമാർക്ക് ടാബുകൾ വിതരണം ചെയ്യുന്നതെന്ന് മന്ത്രി പറഞ്ഞു.