തിരുവനന്തപുരം: സംസ്ഥാനത്ത് ഇന്നും മഴ തുടരുന്നു. വരും മണിക്കൂറിൽ പലയിടത്തും കനത്ത മഴയ്ക്ക് സാദ്ധ്യതയുണ്ടെന്ന് കാലാവസ്ഥ നിരീക്ഷണ കേന്ദ്രം മുന്നറിയിപ്പ് നൽകിയിട്ടുണ്ട്.

അതി ശക്തമായ മഴ പെയ്യുന്ന ഇടുക്കിയിൽ ഓറഞ്ച് അലർട്ട് ‌പ്രഖ്യാപിച്ചിട്ടുണ്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, മലപ്പുറം, കോഴിക്കോട്, വയനാട് എന്നിവടങ്ങളിൽ യെല്ലോ അലർട്ടാണ്.

സംസ്ഥാനത്ത് അടുത്ത അഞ്ചു ദിവസം കൂടിശക്തമായ കാറ്റിനും മഴയ്ക്കും സാദ്ധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. ഏപ്രിൽ 13, 14 ന് ഒറ്റപ്പെട്ട ശക്തമായ മഴയ്ക്കും 13 ന് ഒറ്റപ്പെട്ട അതി ശക്തമായ മഴയ്ക്കുമാണ് സാദ്ധ്യത.

തെക്കൻ തമിഴ്‌നാടിന്റെ തീരദേശത്തിന് മുകളിൽ നിലനിന്നിരുന്ന ചക്രവാതച്ചുഴി അറബിക്കടലിൽ പ്രവേശിച്ചതാണ് കാരണം. ഈ ദിവസങ്ങളിൽ ഉച്ചയ്ക്ക് രണ്ടു മുതൽ രാത്രി 10 വരെയുള്ള സമയത്ത് മഴയ്‌ക്കൊപ്പം ഇടിമിന്നലിനും 40 കി.മീ വരെ വേഗത്തിൽ കാറ്റിനും സാദ്ധ്യതയുണ്ട്.

ഇന്ന് കേരള തീരത്ത് കടൽ പ്രക്ഷുബ്ദകാനും 1.2 മീറ്റർ മുതൽ 1.5 മീറ്റർ വരെ ഉയർന്ന തിരമാലയ്ക്കും സാദ്ധ്യതയുള്ളതിനാൽ തീരവാസികൾ ജാഗ്രത പാലിക്കണം. മത്സ്യബന്ധനത്തിനുള്ള വിലക്ക് തുടരുന്നു. മലയോര മേഖലയിൽ ശക്തമായ മഴ ലഭിക്കുമെന്നതിനാൽ മലവെള്ളമിറങ്ങി നദികളിലെ ജലനിരപ്പ് ഉയരും.