ഇ മെയിൽ അയക്കാൻ ഏറ്റവും കൂടുതൽ പേരും ഉപയോഗിക്കുന്നത് ഗൂഗിളിന്റെ ജി മെയിലാണ്. ആവശ്യമുള്ളതും ഇല്ലാത്തതുമായ നൂറു കണക്കിന് സന്ദേശങ്ങളാണ് ഓരോ ദിവസവും നമ്മുടെ ജി മെയിൽ അക്കൗണ്ടിലേക്ക് വരുന്നത്. അത്തരത്തിൽ വർഷങ്ങളായുള്ള ലക്ഷക്കണക്കിന് മെയിലുകളായിരിക്കും നമ്മുടെ അക്കൗണ്ടിൽ നിറഞ്ഞു കിടക്കുക. അവ സമയോചിതമായി നീക്കം ചെയ്തുകൊണ്ടിരിക്കണം. അല്ലാത്ത പക്ഷം മെയിലുകൾ കൊണ്ട് സ്റ്റോറേജ് ഫുൾ ആവും. അങ്ങനെ ഇൻബോക്സ് നിറഞ്ഞാൽ പിന്നീട് ആരും അയക്കുന്ന സന്ദേശങ്ങൾ നമുക്ക് ലഭിക്കാതെ വരും.

ഒറ്റ ക്ലിക്കിൽ തന്നെ എല്ലാ സന്ദേശങ്ങളെയും സെലക്ട് ചെയ്യാനുള്ള സൗകര്യവും അവ ഡിലീറ്റ് ചെയ്യാനുള്ള സൗകര്യവും ജി മെയിലിലുണ്ട്. എന്നാൽ അങ്ങനെ ചെയ്യുന്നത് വഴി പ്രധാനപ്പെട്ട മെയിലുകളും നഷ്ടപ്പെട്ടുപോകാൻ സാദ്ധ്യതയുണ്ട്. അതിനാൽ തന്നെ ഓരോ സന്ദേശവും തുറന്നു നോക്കി പരസ്യങ്ങൾ പോലെ വേണ്ടാത്തവ ഡിലീറ്റ് ചെയ്തു കളയുന്നതാണ് പലരും പിന്തുടരുന്ന രീതി. ഇത് വളരെ സമയം പിടിക്കുന്ന കാര്യമാണ്. അതിനാൽ തന്നെ ആരും തന്റെ ജിമെയിലിലെ മെസേജുകളൊന്നും ഡിലീറ്റ് ചെയ്യാറില്ല.

വരുന്ന ഭൂരിഭാഗം മെസേജുകളും തുറന്നു പോലും നോക്കാറില്ല എന്നത് മറ്റൊരു വാസ്തവമാണ്. ഇൻബോക്സ് കാലിയാക്കാൻ പലരും പ്രയോഗിക്കുന്നത് ഓരോ മെസേജുകളും സെലക്ട് ചെയ്ത് ഡിലീറ്റ് ചെയ്യുക എന്നതാണ്. പ്രധാനപ്പെട്ട മെയിലുകൾ നഷ്ടപ്പെടാതിരിക്കാനാണ് ഇങ്ങനെ ചെയ്യുന്നത്.

എന്നാൽ ഒറ്റ ക്ലിക്കിൽ പ്രധാനപ്പെട്ട മെയിലുകൾ നഷ്ടപ്പെടാതെ ആവശ്യമില്ലാത്ത എല്ലാ മെയിലുകളും ഡിലീറ്റ് ചെയ്യാൻ സാധിച്ചാൽ എങ്ങനെയുണ്ടാകും? എന്നാൽ അങ്ങനെയൊരു സൗകര്യം ജി മെയിലിലുണ്ട്. പലർക്കും അതിനെ പറ്റി വലിയ ധാരണയില്ല എന്നതാണ് സത്യം.

ജിമെയിലിൽ ഫേസ്ബുക്ക്, ഗൂഗിൾ, ട്വിറ്റർ, യൂട്യൂബ് പോലുള്ള സമൂഹ മാദ്ധ്യമങ്ങളിൽ നിന്നുള്ള നോട്ടിഫിക്കേഷനുകൾളും പല സൈറ്റുകളുടെ പരസ്യങ്ങൾ പോലുള്ളവയൊന്നും നമുക്ക് ആവശ്യമില്ലാത്ത മെയിലുകളായിരിക്കും. ജി മെയിൽ സെർച്ച് ഫിൽട്ടർ ഉപയോഗിച്ചാണ് ഒറ്റയടിക്ക് ആയിരക്കണക്കിന് മെയിലുകൾ ഡിലീറ്റ് ചെയ്യാനാകുന്നത്.

ജി മെയിൽ ഓപ്പൺ ചെയ്ത ശേഷം, മുകളിലെ സെർച്ച് ബാറിന് വലത്തേ അറ്റത്തായുള്ള ഫിൽട്ടർ ഓപ്ഷനിൽ ക്ലിക്ക് ചെയ്യുക. അതിൽ ഉള്ള ഓപ്ഷനുകളിൽ ആദ്യത്തേതായ ഫ്രം എന്ന ഭാഗത്ത് നിങ്ങൾക്ക് സ്ഥിരമായി ആവശ്യമില്ലാത്ത നൂറു കണക്കിന് മെയിൽ അയക്കുന്നവരുടെ മെയിൽ അഡ്രസ് ടൈപ്പ് ചെയ്യുക. ശേഷം താഴെയുള്ള സെർച്ചിൽ ക്ലിക്ക് ചെയ്യുക. ഇപ്പോൾ ആ അഡ്രസിൽ നിന്ന് നിങ്ങൾക്ക് വന്ന മെയിലുകളെല്ലാം കാണിക്കും. ഈ വന്ന മെയിലുകളെ മുഴുവനായി സെലക്ട് ചെയ്യാൻ ഇടത് വശത്തുള്ള ചെറിയ ചതുരാകൃതിയിലുള്ള ബോക്സിൽ ക്ലിക്ക് ചെയ്യുക. എല്ലാം സെലക്ട് ആയി കഴിഞ്ഞാൽ അവ ഡിലീറ്റ് ചെയ്യാം.

ഉദാഹരണത്തിന് സൊമാറ്റോ അയച്ച നോട്ടിഫിക്കേഷനുകളെല്ലാം ഡിലീറ്റ് ചെയ്യാൻ ഫിൽട്ടറിൽ സൊമാറ്റോ എന്ന് സെർച്ച് ചെയ്താൽ മതി. ഇത്തരത്തിൽ അനാവശ്യമായ മെയിലുകളെല്ലാം ഡിലീറ്റ് ചെയ്തു കഴിഞ്ഞാൽ വളരെ തുച്ചമായ എണ്ണം മെയിലുകൾ മാത്രമേ നമ്മുടെ അക്കൗണ്ടിൽ കാണുകയുള്ളു. ഈ വഴി ഫോണിലും ലഭ്യമാണ്. എന്നിരുന്നാലും കംപ്യൂട്ടറിൽ ഉപയോഗിക്കുന്നതാണ് കുറച്ചു കൂടി എളുപ്പം.