5% സ്ളാബിന് പകരം 3%, 8% സ്ളാബുകൾക്ക് നീക്കം
ന്യൂഡൽഹി: ജി.എസ്.ടിയിലെ ഏറ്റവും താഴ്‌ന്ന സ്ളാബായ അഞ്ച് ശതമാനം നിറുത്തലാക്കാനും ഈ സ്ലാബിലെ ഉത്‌പന്ന/സേവനങ്ങൾക്കായി പുതിയ സ്ലാബുകൾ രൂപീകരിക്കാനും അടുത്തമാസം ചേരുന്ന ജി.എസ്.ടി കൗൺസിൽ യോഗം തീരുമാനിച്ചേക്കും. ജനങ്ങൾ ഏറ്റവുമധികം ഉപയോഗിക്കുന്ന ഉത്‌പന്ന/സേവനങ്ങളെ മൂന്ന് ശതമാനം സ്ലാബിലേക്ക് മാറ്റിയേക്കുമെന്നാണ് സൂചന.
നിലവിൽ മൂന്ന് ശതമാനമെന്ന സ്ലാബില്ലെങ്കിലും സ്വർണം, സ്വർണാഭരണം എന്നിവയ്ക്കുള്ളത് മൂന്ന് ശതമാനം ജി.എസ്.ടിയാണ്. ഇതൊരു സ്ളാബാക്കി മാറ്റാനാണ് സാദ്ധ്യത. അഞ്ചു ശതമാനം സ്ളാബിലെ മറ്റ് ഉത്‌പന്ന/സേവനങ്ങളെ മറ്റൊരു സ്ളാബ് പുതുതായി സൃഷ്‌ടിച്ച് അതിലേക്ക് മാറ്റും. എട്ട് ശതമാനം സ്ളാബിനാണ് സാദ്ധ്യത; എന്നാൽ 7, 9 ശതമാനം സ്ളാബുകൾ സംബന്ധിച്ചും ആലോചനകളുണ്ട്.
ജി.എസ്.ടി ബാധകമല്ലാത്ത ഒട്ടേറെ ഉത്പന്നങ്ങളെ ജി.എസ്.ടിക്ക് കീഴിൽ കൊണ്ടുവരാനും സാദ്ധ്യതയുണ്ട്. പായ്ക്കു ചെയ്യാത്തതും അൺബ്രാൻഡഡുമായ ഉത്‌പന്നങ്ങൾ, പാലുത്പന്നങ്ങൾ തുടങ്ങിയവയ്ക്കാണ് നികുതി ബാധകമാക്കിയേക്കുക. കർണാടക മുഖ്യമന്ത്രി ബസവരാജ് ബൊമ്മൈ അദ്ധ്യക്ഷനായ സംസ്ഥാന ധനമന്ത്രിമാരുടെ പാനലിന്റേതാണ് സ്ളാബ് പരിഷ്‌കരണം സംബന്ധിച്ച ശുപാർശകൾ. പാനലിന്റെ റിപ്പോർട്ട് ഉടൻ കൗൺസിലിന് കൈമാറും.
നഷ്‌ടം നികത്താൻ
സ്ളാബ് പരിഷ്‌കരണം
ജി.എസ്.ടി 2017 ഏപ്രിൽ ഒന്നിന് പ്രാബല്യത്തിൽ വരുമ്പോൾ, പ്രതിവർഷം 14 ശതമാനത്തിന് താഴെ നികുതിവരുമാന വർദ്ധന കുറിക്കുന്ന സംസ്ഥാനങ്ങൾക്ക് അഞ്ചു വർഷത്തേക്ക് ആനുപാതിക നഷ്‌ടപരിഹാരം കേന്ദ്രം നൽകുമെന്ന് ധാരണയുണ്ടായിരുന്നു. ഇതിന്റെ കാലാവധി ഈവർഷം ജൂണിൽ തീരും. ഈ പശ്ചാത്തലത്തിലാണ് സംസ്ഥാനങ്ങളുടെ വരുമാനത്തകർച്ച തടയുന്നത് ലക്ഷ്യമിട്ട് സ്ളാബുകൾ പരിഷ്‌കരിക്കാനുള്ള നീക്കം.
റവന്യൂ ന്യൂട്രൽ
റേറ്റ് ഉയർത്തണം
ജി.എസ്.ടിക്ക് മുമ്പ് റവന്യൂ ന്യൂട്രൽ റേറ്റ് 16 ശതമാനമായിരുന്നത് ഇപ്പോൾ 11.6 ശതമാനമാണ്. കേന്ദ്രത്തിനും സംസ്ഥാനങ്ങൾക്കും നികുതിവരുമാനനഷ്‌ടം ഉണ്ടാകാതിരിക്കാനുള്ള ഏറ്റവും കുറഞ്ഞ ശരാശരി നികുതിയാണിത്.
ഉപഭോക്തൃ താത്പര്യാർത്ഥം ഒട്ടേറെ ഉത്‌പന്നങ്ങളുടെ ജി.എസ്.ടി വെട്ടിക്കുറച്ചതാണ് റവന്യൂ ന്യൂട്രൽ റേറ്റ് താഴാൻ കാരണം.
തുടക്കത്തിൽ 228 ഉത്പന്നങ്ങൾക്ക് 28 ശതമാനം സ്ളാബിലുണ്ടായിരുന്നത് ഇപ്പോൾ 35 ആയിക്കുറഞ്ഞു.
ഒരുലക്ഷം കോടിയോളം രൂപയുടെ വരുമാനക്കുറവാണ് ജി.എസ്.ടിയിൽ നിലവിൽ നേരിടുന്നത്.
റവന്യൂ ന്യൂട്രൽ റേറ്റ് ഉയർത്തി, വരുമാനം മെച്ചപ്പെടുത്തുന്നതിനായാണ് ജി.എസ്.ടി സ്ളാബ് പരിഷ്‌കരണവും പുതുതായി ഉത്പന്നങ്ങളെ ജി.എസ്.ടി ഉൾപ്പെടുത്താനുള്ള നീക്കവും.