തിരുവനന്തപുരം: ഭൂരിപക്ഷ വർഗീയത ഏറ്റവും അപകടകരമെന്ന് മന്ത്രി എം വി ഗോവിന്ദൻ. ന്യൂനപക്ഷ വർഗീയതയ്ക്ക് കാരണം ഭൂരിപക്ഷ വർഗീയതയാണെന്നും അദ്ദേഹം പറഞ്ഞു.
പാലക്കാട് ഇരട്ടക്കൊലപാതകത്തിന്റെ പശ്ചാത്തലത്തിൽ മാദ്ധ്യമങ്ങളോട് സംസാരിക്കുകയായിരുന്നു മന്ത്രി. ഭൂരിപക്ഷ വർഗീയതയാണല്ലോ ഈ രാജ്യത്ത് ഹിന്ദുരാഷ്‌ട്രം ഉണ്ടാക്കാൻ ശ്രമിക്കുന്നതെന്ന് മന്ത്രി ചോദിച്ചു.
'ഹിന്ദു രാഷ്‌ട്രം ഉണ്ടാക്കാനുള്ള ശ്രമത്തിന്റെ ഭാഗം തന്നെയാണ് ന്യൂനപക്ഷ വിരോധം. ഇതിന്റെ ഭാഗം തന്നെയാണ് സംഘർഷങ്ങൾ. രണ്ട് ഭീകരതയും ജനങ്ങൾക്ക് ഭീഷണിയാണ്. വർഗീയ സംഘട്ടനങ്ങളിലൂടെ സംഘടന ശക്തിപ്പെടുത്താൻ ശ്രമം നടക്കുന്നു. പൊലീസും സർക്കാ‌രും മാത്രം വിചാരിച്ചാൽ രാഷ്‌ട്രീയ അക്രമങ്ങൾ തടയാനാവില്ല'- മന്ത്രി പറഞ്ഞു.