ആരും ഒരിക്കലും ടാറ്റൂ ചെയ്യരുതെന്ന് നിർദ്ദേശിച്ച് ആരാധകരുടെ പ്രിയതാരം സാമന്ത. കഴിഞ്ഞ ദിവസം ഇൻസ്റ്റഗ്രാം സ്റ്റോറിയിലൂടെയാണ് താരം ഇക്കാര്യം പങ്കുവച്ചത്. താൻ സ്വയം ഉപദേശിക്കുന്ന കാര്യവും ഇതു തന്നെയാണെന്നും താരം പറഞ്ഞു.

ഒരു ദിവസം പരീക്ഷിക്കാൻ ആഗ്രഹിക്കുന്ന ടാറ്റൂ ഐഡിയകൾ എന്തൊക്കെയാണെന്ന ആരാധകന്റെ ചോദ്യത്തിനാണ് ആരും ടാറ്റൂ ചെയ്യരുതെന്ന് സാമന്ത പറഞ്ഞത്. എന്നാൽ സ്വന്തം ശരീരത്ത് ചെയ്ത ടാറ്റൂകൾ ആരാധകരോട് പങ്കുവയ്ക്കാൻ ഏറെ ഇഷ്ടപ്പെട്ടിരുന്നയാളാണ് സാമന്ത. ഇതിന്റെ ചിത്രങ്ങളും താരം പങ്കുവച്ചിട്ടുണ്ട്. മൂന്ന് ടാറ്റൂകളാണ് താരം ശരീരത്തിന്റെ വിവിധയിടങ്ങളിലായി ചെയ്തിട്ടുള്ളത്.

മുൻ ഭർത്താവ് നാഗചൈതന്യയ്ക്കൊപ്പം ആദ്യമായി അഭിനയിച്ച യേ മായ ചെസാവേ എന്ന സിനിമയുടെ ഓർമ്മയ്ക്കായി കഴുത്തിന് പിന്നിലായി ഇംഗ്ളീഷ് അക്ഷരങ്ങളായ വൈ എം സി എന്ന് താരം പച്ചകുത്തിയിട്ടുണ്ട്. യേ മായ ചെസാവേയുടെ ചിത്രീകരണ വേളയിലാണ് ഇരുവരും അടുപ്പത്തിലാകുന്നത്. രണ്ടാമത്തെ ടാറ്റൂ ചെയ്തിരിക്കുന്നത് ഇടുപ്പിലായിട്ടാണ്. വാരിയെല്ലിനോട് ചേർന്ന് നാഗചൈതന്യയുടെ വിളിപ്പേരായ ചായ് എന്നാണ് പച്ചക്കുത്തിയിരിക്കുന്നത്. മൂന്നാമത്തേത് സാമന്തയും നാഗചൈതന്യയും ഒരുപോലെ ചെയ്ത കപ്പിൾ ടാറ്റൂവാണ്. ഏറെനാളത്തെ പ്രണയത്തിന് ശേഷം 2017ൽ വിവാഹിതരായ ഇരുവരും 2021ലായിരുന്നു വേർപിരിഞ്ഞത്.