തിരുവനന്തപുരം കെ.എസ്.ഇ.ബി ഓഫീസേഴ്സ് അസോസിയേഷൻ സംസ്ഥാന പ്രസിഡന്‍റ് എം ജി സുരേഷ് കുമാറിന് പിഴ ചുമത്തിയത് ചട്ടപ്രകാരമെന്ന് കെ.എസ്.ഇ.ബി വ്യക്തമാക്കി. ഡെപ്യൂട്ടേഷനിൽ പോയ സുരേഷിന് വാഹനം അനുവദിച്ച് ബോർഡ് ഉത്തരവിറക്കിയിട്ടില്ല. വാഹനം ഉപയോഗിക്കാനുള്ള സർക്കാർ ഉത്തരവും ബോർഡിൽ നൽകിയിട്ടില്ല.അസി. പ്രൈവറ്റ് സെക്രട്ടറി റാങ്കിലുള്ളയാൾക്ക് വാഹനം അനുവദിക്കാറില്ലെന്നും സർവീസ് റൂൾ പ്രകാരം കെ എസ് ഇ ബിക്ക് നടപടിയെടുക്കാൻ അധികാരമുണ്ടെന്നും കെ എസ് ഇ ബി വിശദീകരിച്ചു .
2019 മുതൽ ബോർഡ് വിജിലൻസ് വിശദമായി പരിശോധിച്ചു കൊണ്ടിരിക്കുന്ന പരാതി ഫയലിലാണ്, രണ്ടു റിപ്പോർട്ടുകൾക്കു ശേഷമാണ് നടപടിയെടുത്തത്. ചീഫ് വിജിലൻസ് ഓഫീസറുടെയും ഡയറക്ടർ (ഫിനാൻസ്)ന്റെയും വിശദ പരിശോധനയ്ക്ക് ശേഷം ഔദ്യോഗിക ആവശ്യങ്ങൾക്കല്ലാതെ വാഹനം ഉപയോഗിച്ചതായി വ്യക്തമായി ബോധ്യപ്പെട്ടതിന്റെ അടിസ്ഥാനത്തിലാണ് നോട്ടീസ് നൽകിയിട്ടുള്ളതെന്നും കെ.എസ്.ഇ.ബി ഫേസ്ബുക്ക് പോസ്റ്റിൽ വ്യക്തമാക്കുന്നു.