തിരുവനന്തപുരം: മലയാള സിനിമയിലെ നിത്യഹരിതനായകൻ പ്രേംനസീറിന്റെ ചിറയിൻകീഴ് പുളിമൂട് ജംഗ്ഷന് സമീപം കോരാണി റോഡിലെ വീട് വില്പനയ്‌ക്ക്. പ്രേംനസീർ വിട പറഞ്ഞ് 30 വർഷമായെങ്കിലും അദ്ദേഹത്തിന്റെ ഓർമ്മകളുള്ള ലൈല കോട്ടേജ് കാണാൻ സിനിമാ പ്രേമികളുൾപ്പെടെ നിരവധിപ്പേർ എത്താറുണ്ട്.

നസീറിന്റെ ഇളയ മകളായ റീത്തയ്ക്കാണ് ഭാഗംവയ്പ്പിലൂടെ വീട് ലഭിച്ചത്. പിന്നീട് റീത്ത തന്റെ മകൾക്ക് വീട് കൈമാറി. കുടുംബസമേതം അമേരിക്കയിലുള്ള ഇവർക്ക് വീട് നിലനിറുത്താൻ താത്പര്യമില്ലാത്തതാണ് വില്പനയ്‌ക്കുവയ്‌ക്കാൻ കാരണം. ലൈല കോട്ടേജ് സർക്കാർ വിലയ്‌ക്കുവാങ്ങി സ്‌മാരകമാക്കണമെന്നാണ് നാട്ടുകാരുടെയും സാംസ്‌കാരിക പ്രവർത്തകരുടെയും ആവശ്യം. 60വർഷത്തോളം പഴക്കമുള്ള വീടാണെങ്കിലും കോൺക്രീറ്റിനോ ചുമരുകൾക്കോ യാതൊരു കേടുപാടുകളും സംഭവിച്ചിട്ടില്ല.