കൊച്ചി: പ്രീമിയം വിവിധോദ്ദേശ്യ വാഹന ശ്രേണിയിൽ (എം.പി.വി) മാരുതി സുസുക്കി നെക്‌സ വിതരണശൃംഖലയിലൂടെ വിപണിയിലെത്തിച്ച് വൻ വില്പനനേട്ടം കൊയ്‌ത മോഡലാണ് എക്‌സ്.എൽ6.
സെമി-കണ്ടക്‌ടർ (ചിപ്പ്) ക്ഷാമം, അസംസ്കൃതവസ്തുക്കളുടെ വിലവർദ്ധന, ഇന്ധനവിലക്കുതിപ്പ് എന്നിങ്ങനെ വാഹന നിർമ്മാണലോകം തിരിച്ചടികളുടെ ഘോഷയാത്രയിലൂടെ കടന്നുപോകുമ്പോഴും സ്ഥിതി ഏറെ വൈകാതെ മെച്ചപ്പെടുമെന്ന ആത്മവിശ്വാസത്തോടെയും പുത്തൻ മോഡലുകളിലൂടെ വിജയിച്ച് കയറാമെന്ന പ്രതീക്ഷയുടെ പിൻബലത്തിലും മാരുതി സുസുക്കി കഴിഞ്ഞദിവസം എക്‌സ്.എൽ6ന്റെ ഫേസ്ലിഫ്റ്റ് പുറത്തിറക്കി.
75.8 കെ.ഡബ്ള്യു കരുത്തുള്ള, 1.5 ലിറ്റർ, കെ15സി, 4-സിലിണ്ടർ പെട്രോൾ എൻജിനാണ് പുതിയ പതിപ്പിനുള്ളത്. മികച്ച പെർഫോമൻസ് കാഴ്‌ചവയ്ക്കാനും ഇന്ധനക്ഷമത ഉറപ്പാക്കാനും ഡ്രൈവിംഗ് കൂടുതൽ ലളിതമാക്കാനും സഹായിക്കുന്ന ഡ്യുവവെറ്റ് ടെക്‌നോളജിയുടെ പിന്തുണയുള്ള എൻജിനാണിത്.
പാഡിൽ ഷിഫ്‌റ്റുകളോട് കൂടിയ പുതുപുത്തൻ 6-സ്പീഡ് ഓട്ടോമാറ്റിക് ട്രാൻസ്‌മിഷൻ സംവിധാനമുള്ളതാണ് എക്‌സ്.എൽ6 ഫേസ്ലിഫ്റ്റ്. വെന്റിലേറ്റഡ് മുൻ സീറ്റുകൾ, റിമോട്ട്, സ്മാർട്ട് വാച്ച്, വോയിസ് കമാൻഡ് എന്നിവയോടൊപ്പം ഉപയോഗിക്കാവുന്ന 40ലേറെ ഫീച്ചറുകളോട് കൂടിയ ഇൻ-ബിൽറ്റ് സുസുക്കി കണക്‌ട്, രണ്ടാംനിരയിൽ ക്യാപ്‌ടൻ സീറ്റുകൾ എന്നിങ്ങനെ ധാരാളം മികവുകളുമായാണ് പുത്തൻ എക്‌സ്.എൽ6 എത്തുന്നത്.