കൊച്ചി: യൂറോയ്ക്ക് ആനുപാതികമായ നിശ്ചിത തുക ആയുഷ്കാലം നൽകാമെന്ന് വിശ്വസിപ്പിച്ച് മണിചെയിൻ മാതൃകയിൽ നിരവധി പേരിൽ നിന്ന് പണം തട്ടിയ രണ്ടു പേരെ പാലാരിവട്ടം പൊലീസ് അറസ്റ്റ് ചെയ്തു. യുവാവിനെയും ബന്ധുക്കളെയും കബളിപ്പിച്ച് 10 ലക്ഷം രൂപ തട്ടിയെന്ന കേസിൽ പ്രതികളായ നാല് പേരിൽ വെണ്ണല ചക്കാലക്കടവ് വീട്ടിൽ ജോഷി (51), തമ്മനം നിലവറയത്ത് വീട്ടിൽ ബെ‌‌ർസൺ (52) എന്നിവരാണ് പിടിയിലായത്. പലരിൽ നിന്നായി ഇവർ തട്ടിയെടുത്ത ഒരു കോടിയോളം രൂപ ബിറ്റ് കോയിനാക്കി മാറ്രിയിട്ടുണ്ടെന്നും പൊലീസ് അന്വേഷണത്തിൽ കണ്ടെത്തി.

ക്രൗഡ്‌വൺ എന്ന മൾട്ടി ലെവൽ സ്ഥാപനത്തിൽ 50,000 രൂപ നിക്ഷേപിച്ചാൽ ആഴ്ചയിൽ രണ്ടര യൂറോയ്ക്ക് ആനുപാതികമായ തുക ആയുഷ്കാലം അക്കൗണ്ടിലെത്തുമെന്നായിരുന്നു വാഗ്ദാനം. 2020 മുതലാണ് പ്രതികൾ ക്രൗഡ് വണ്ണിന്റെ പേരിൽ തട്ടിപ്പ് തുടങ്ങുന്നതെന്നാണ് പൊലീസ് പറയുന്നത്. അക്കൗണ്ടിൽ തുകയെത്താതായതോടെയാണ് തട്ടിപ്പ് മനസ്സിലായത്. പാലാരിവട്ടത്ത് നിന്നാണ് പ്രതികൾ പിടിയിലായത്. ഇവരെ വിവിധ ഇടങ്ങളിലെത്തിച്ച് തെളിവെടുത്തു. പ്രതികളുടെ ബാങ്ക്, ഫോൺ രേഖകൾ വിശദമായി പരിശോധിക്കുമെന്ന് പൊലീസ് പറഞ്ഞു. പ്രതികളെ കോടതിയിൽ ഹാജരാക്കി.