ഭൂവനേശ്വർ: ഇന്ത്യൻ വനിതാ ലീഗിൽ ജയം തുടർന്ന് ഗോകുലം കേരള. ഇന്നലെ നടന്ന മത്സരത്തിൽ 6-1ന് പിഫ സ്‌പോട്സ് എഫ്.സിയേയാണ് പരാജയപ്പെടുത്തിയത്. മത്സരത്തിന്റെ തുടക്കം മുതൽ ഗോകുലത്തിന് അവസരം ലഭിച്ചെങ്കിലും ആദ്യ ഗോൾ പിറക്കാൻ 27ാം മിനുട്ട് വരെ കാത്തിരിക്കേണ്ടി വന്നു.

വലത് കോർണറിൽ നിന്ന് വന്ന ക്രോസിനെ ഹെഡറിലൂടെ വിൻ കൃത്യമായി വലയിലെത്തിച്ചു. ഗോകുലത്തിന് ഒരു ഗോൾ ലീഡ്. ആദ്യ ഗോൾ വന്നതോടെ ഗോകുലത്തിന്റെ സ്റ്റാർട്ടിങ് ട്രബിൾ മാറി. പിന്നീട് കൂടുതൽ മികച്ച മുന്നേറ്റങ്ങൾ നടത്തി ഗോകുലം എതിർ ടീമിനെ പ്രതിരോധത്തിലാക്കി. 42ാം മിനുട്ടിൽ മനീഷയിലൂടെ ഗോകുലം ലീഡ് രണ്ടാക്കി ഉയർത്തി. ആദ്യ പകുതിയുടെ ഇൻജുറി ടൈമിൽ വിൻ വീണ്ടും ഗോൾ നേടി ആദ്യ പകുതിയിൽ മൂന്ന് ഗോളിന്റെ ലീഡ് നേടി.

രണ്ടാം പകുതിയുടെ തുടക്കത്തിൽ 49ാം മിനുട്ടിൽ കരിഷ്മയുടെ ഗോൾ സ്‌കോർ 4-0. ഇതിനിടെ ഗോകുലം കേരളയുടെ വലയിൽ പന്തെത്തി. ലീഗിൽ ആദ്യമായ ഗോകുലം വഴങ്ങുന്ന ഗോൾ കൂടിയായിരുന്നു ഇത്. 60ാം മിനുട്ടിൽ നിസിലയാണ് പിഫയുടെ ആശ്വാസ ഗോൾ നേടിയത്. എന്നാൽ അധികം വൈകാതെ മനീഷയിലൂടെ ഗോകുലം വീണ്ടും ഗോൾ നേടി. സ്‌കോർ 5-1. 80ാം മിനുട്ടിൽ രതൻ കൂടി ഗോകുലത്തിനായി ഗോൾ നേടി സ്‌കോർ 6-1 എന്നാക്കി.

മെയ് ഒന്നിന് മാതാ രുഗ്മിണി ഫുട്‌ബോൾ ക്ലബിനെതിരേയാണ് ഗോകുലത്തിന്റെ അടുത്ത മത്സരം. എൽഷദായിയേയും സോണാലിയേയും ബെഞ്ചിലിരുത്തിയായിരുന്നു പരിശീലകൻ ആന്റണി ആൻഡ്രൂസ് ആദ്യ ഇലവൻ കളത്തിലിറക്കിയത്.