കൊൽക്കത്ത: ഐ ലീഗ് കിരീടം നിലനിർത്താൻ ഗോകുലം കേരള ഇന്ന് ചർച്ചിൽ ബ്രദേഴ്സിനെ നേരിടും. വൈകിട്ട് അഞ്ചിന് കല്യാണി സ്‌റ്റേഡിയത്തിലാണ് പോരാട്ടം നടക്കുന്നത്. നിലവിൽ ഗോകുലം കേരളയാണ് പോയിന്റ് പട്ടികയിൽ ഒന്നാം സ്ഥാനത്ത് നിൽക്കുന്നത്. 13 മത്സരത്തിൽ നിന്ന് 33 പോയിന്റുള്ള ഗോകുലത്തിന് ഏഴ് പോയിന്റ് അകലെയാണ് കിരീടം.

ഇനി അഞ്ച് മത്സരമാണ് ഗോകുലത്തിന് ലീഗിൽ ബാക്കിയുള്ളത്. അതിൽ രണ്ടെണ്ണത്തിൽ ജയവും ഒരു സമനിലയും നേടിയാൽ ഐ ലീഗ് കിരീടം വീണ്ടും ഗോകുലത്തിന്റെ ഷെൽഫിലെത്തുമെന്ന കാര്യത്തിൽ സംശയമില്ല.

ലീഗിന്റെ ആദ്യ ഘട്ട മത്സരത്തിൽ ചർച്ചിൽ ബ്രദേഴ്സുമായി ഏറ്റുമുട്ടിയപ്പോൾ ഗോകുലം കേരളക്കൊപ്പമായിരുന്നു ജയം. അന്ന് എതിരില്ലാത്ത ഒരു ഗോളിനായിരുന്നു ഗോകുലം ജയം സ്വന്തമാക്കിയത്. കൂടാതെ ലീഗിൽ മേധാവിത്തം തുടരുന്നതിനാൽ ചർച്ചിൽ ബ്രദേഴ്സിനെ അനായാസം കീഴടക്കാൻ കഴിയുമെന്ന വിശ്വാസത്തിലാണ് പരിശീലകൻ അന്നീസെയും സംഘവും.

നിലവിൽ താരങ്ങളെല്ലാം മികച്ച ഫോമിലാണെന്നതിനാൽ ജയം തുടരാനാകുമെന്ന പ്രതീക്ഷയിലാണ് ടീം. ഐ ലീഗിൽ തോൽവി അറിയാതെ 18 മത്സരം പൂർത്തിയാക്കിയ ഗോകുലം ജൈത്രയാത്ര തുടരാൻ വേണ്ടിയാണ് ഇന്ന് കല്യാണിയിൽ ചർച്ചിലിനെതിരേ ബൂട്ടുകെട്ടുന്നത്. കിരീടപ്പോരാട്ടത്തിൽ ഗോകുലം കേരളക്കൊപ്പമുണ്ടായിരുന്ന മുഹമ്മദൻസിന്റെ തോൽവിയും സമനിലയുമാണ് ഗോകുലം കേരളയുടെ കിരീടത്തിലേക്കുള്ള ദൂരം കുറച്ചത്. മുഹമ്മദൻസിന്റെ അവസാന രണ്ട് മത്സരവും സമനിലയിൽ കലാശിക്കുകയായിരുന്നു.