പാലക്കാട്: കെ റെയിൽ പദ്ധതിക്കെതിരെ യൂത്ത് കോൺഗ്രസ് നടത്തിയ മാർച്ചിൽ സംഘർഷം. കെ റെയിൽ വേണ്ട, കേരളം മതി എന്ന മുദ്രാവാക്യവുമായി താരേക്കാട് ഗവ. റസ്റ്റ് ഹൗസിന് സമീപമുള്ള ആർ.ഡി.ഒ ഓഫീസിലേക്ക് നടത്തിയ മാർച്ചിനിടെയാണ് പൊലീസും യൂത്ത് കോൺഗ്രസ് പ്രവർത്തകരും തമ്മിൽ സംഘർഷം നടന്നത്. കെ റെയിൽ എന്നെഴുതിയ കല്ലുകളുമായി ആർ.ടി.ഒ ഓഫീസിലേക്ക് ഓടി കയറാൻ ശ്രമിച്ച പ്രവർത്തകരെ പൊലീസ് തടഞ്ഞു. തുടർന്ന് ബലം പ്രയോഗിച്ച് പ്രവർത്തകരെ തള്ളി മാറ്റുന്നതിനിടെ പ്രവർത്തകരിൽ ഒരാൾ കെ റെയിൽ കല്ല് ആർ.ഡി.ഒ വളപ്പിലേക്ക് വലിച്ചെറിഞ്ഞു. ഇതിനിടെ ഓഫീസ് വളപ്പിലുണ്ടായിരുന്ന പൊലീസ് കുറ്റി എടുത്ത് തിരിച്ചെറിഞ്ഞതോടെ പൊലീസും പ്രവർത്തകരും തമ്മിൽ ഉന്തും തള്ളും വാക്കേറ്റത്തിലേക്കുമെത്തി. തുടർന്ന് പ്രവർത്തകരെ അറസ്റ്റ് ചെയ്ത് ടൗൺ നോർത്ത് പൊലീസ് സ്‌റ്റേഷനിലേക്ക് മാറ്റി. യൂത്ത് കോൺഗ്രസ് നിയോജക മണ്ഡലം പ്രസിഡന്റ് കെ.സദ്ദാം ഹുസൈന്റെ നേതൃത്വത്തിലായിരുന്നു ആർ.ഡി.ഒ ഓഫീസിലേക്ക് മാർച്ച് നടത്തിയത്.