കോന്നി: മലയാലപ്പുഴ ഗവ.എൽ.പി സ്‌കൂളിന്റെ ഒന്നാം നിലയുടെ നിർമ്മാണം ഉടൻ ആരംഭിക്കുമെന്നു സ്കൂളിൽ സന്ദർശനം നടത്തിയ ശേഷം കെ.യു ജനീഷ് കുമാർ എം.എൽ.എ അറിയിച്ചു. പൊതു വിദ്യാഭ്യാസ വകുപ്പിൽ നിന്നും അനുവദിച്ച ഒരുകോടി 20ലക്ഷം രൂപ വിനിയോഗിച്ചുള്ള നിർമ്മാണ പ്രവർത്തികളാണ് ആരംഭിക്കുക. 2500 ചതുരശ്ര അടിയിൽ മൂന്ന് സ്മാർട്ട്‌ ക്ലാസ് റൂമുകൾ കോൺഫറൻസ് ഹാൾ, ലൈബ്രറി, ശുചിമുറി, ചുറ്റുമതിൽ, കവാടം,ഓപ്പൺ എയർ ഓഡിറ്റോറിയം എന്നിവ നിർമ്മിക്കും. സ്കൂളിന്റെ ആദ്യത്തെ നിലയുടെ പണികൾ അവസാനഘട്ടത്തിലാണ്. ഇതിന്റെ മുകളിലാണ് ഒന്നാമത്തെ നിലയുടെ നിർമ്മാണപ്രവർത്തനങ്ങൾ ആരംഭിക്കുന്നത്. മലയാലപ്പുഴ പഞ്ചായത്ത്‌ പ്രസിഡന്റ് ഷീല കുമാരി ചാങ്ങയിൽ, ബ്ലോക്ക് പഞ്ചായത്തംഗം സുജാത അനിൽ, പഞ്ചായത്ത്‌ വൈസ് പ്രസിഡന്റ് കെ.ഷാജി, ക്ഷേമകാര്യ സ്ഥിരം സമിതി അദ്ധ്യക്ഷൻ എസ്. ബിജു, പഞ്ചായത്തംഗം എൻ.വളർമതി, പഞ്ചായത്ത് സെക്രട്ടറി വി.എൻ അനിൽ ,പൊതു മരാമത്ത് കെട്ടിട വിഭാഗം എക്സിക്യൂട്ടീവ് എൻജിനീയർ ഷീന രാജൻ, അസിസ്റ്റന്റ് എക്സിക്യൂട്ടീവ് എൻജിനീയർ ആശ,അസി.എൻജിനീയർ മെജോ എന്നിവരും ഒപ്പമുണ്ടായിരുന്നു.