ചെങ്ങന്നൂർ: ചെങ്ങന്നൂർ ദേവി തൃപ്പൂത്തായി. ആറാട്ട് വെള്ളിയാഴ്ച രാവിലെ 7.30ന് പമ്പാനദിയിലെ മിത്രപ്പുഴ കടവിൽ നടക്കും. മലയാളവർഷത്തിലെ ഏഴാമത്തെ തൃപ്പൂത്താണിത്. ചടങ്ങുകൾക്ക് താഴ്മൺ തന്ത്രി കണ്ട്ഠരര് മോഹനര് മുഖ്യകാർമ്മികത്വം വഹിക്കും. ആറാട്ട് ഘോഷയാത്ര ക്ഷേത്രത്തിന്റെപടിഞ്ഞാറെ നടയിലെത്തിയശേഷം പ്രത്യേകം സജ്ജമാക്കിയ മണ്ഡപത്തിൽ ഭക്തർക്ക് മഞ്ഞൾപ്പറ, നെൽപ്പറ സമർപ്പണം നടത്താം. തുടർന്ന് പ്രദക്ഷിണം പൂർത്തിയാക്കി ദേവകളെ ശ്രീകോവിലിലേക്ക് ആനയിക്കും. പിന്നീട് ഇരുനടകളിലും കളഭാഭിഷേകവും വിശേഷാൽപൂജകളും നടക്കും. ആറാട്ടുദിവസം മുതൽ 12 ദിവസത്തേക്ക് ക്ഷേത്രത്തിലെ വിശേഷാൽ വഴിപാടായ ഹരിദ്രപുഷ്പാഞ്ജലി നടത്താനുള്ള സൗകര്യം ഉണ്ടായിരിക്കുമെന്ന് അഡ്മിനിസ്‌ട്രേറ്റീവ് ഓഫീസർ വി.ജി പ്രകാശ് അറിയിച്ചു.