കോന്നി: ഗ്രാമപഞ്ചത്തിലെ മൂന്നാം വാർഡിലെ ചെങ്ങറ - കുരിശുംമൂട് ജംഗ്ഷനിൽ നിന്നും തുടങ്ങി പഴയ പോസ്റ്റോഫീസ് പടി വരെയുള്ള സഹകരണ മെമ്മോറിയൽ റോഡിന്റെ പണികൾ പൂർത്തിയാകാത്തതിനാൽ റോഡിലൂടെയുള്ള യാത്ര ദുഷ്കരമാകുന്നു. ഗതാഗത സൗകര്യങ്ങൾ പരിമിതമായിരുന്ന കാലത്ത് ചെങ്ങറ നിവാസികൾക്ക് കണികിടത്തുപടി, കുമ്പഴ തോട്ടം,മുക്കോത്തിപുന്ന വഴി പുതുകുളത്തേക്കു പോകാനായി നാട്ടുകാർ നിർമ്മിച്ച റോഡാണിത്. കഴിഞ്ഞ ജില്ലാ പഞ്ചായത്ത് ഭരണസമിതിയുടെ സമയത്ത് റോഡ് വികസനത്തിനായി 10 ലക്ഷം രൂപ അനുവദിച്ചിരുന്നു. ഒരു കിലോമീറ്റർ ദൂരമുള്ള റോഡിന്റെ കുറെ ഭാഗങ്ങളിൽ വീതി കൂട്ടിയെങ്കിലും പല ഭാഗങ്ങളിലും സൈഡുകൾ ജെ.സി.ബി ഉപയോഗിച്ച് പൊളിച്ചിടുകയും കലുങ്കുകളുടെ ഭാഗങ്ങളിൽ ഓടയുടെ മുകളിൽ സ്ലാബിടാതെയും പണികൾ മുടങ്ങി കിടക്കുകയാണ്. റോഡുപണി പാതിവഴിയിൽ നിലച്ചതുമൂലം കാൽ നടയാത്രക്കാർക്കും വാഹന യാത്രക്കാർക്കും ബുദ്ധിമുട്ടാണ്. റോഡിലെ 100 മീറ്റർ ഭാഗത്താണ് കുറെ പണികൾ ചെയ്തു പൂർത്തിയാകാതെ കിടക്കുന്നത്. ഓടകളുടെ മുകളിൽ സ്ലാബിടാതെ പണികൾ മുടങ്ങിയാൽ അപകട സാദ്ധ്യതയുമുണ്ട്.

......................................

മുടങ്ങിയ റോഡ് പണികൾ പൂർത്തിയാക്കാൻ നടപടി സ്വീകരിക്കണമെന്ന് ആവശ്യപെട്ട് പഞ്ചായത്ത് അസിസ്റ്റന്റ് എൻജിനീയർക്ക് പരാതി നൽകിയിട്ടുണ്ട്. മുടങ്ങി കിടക്കുന്ന പണികൾ പൂർത്തിയാക്കാൻ നടപടി സ്വീകരിച്ചില്ലെങ്കിൽ കോന്നി പഞ്ചായത്ത് ഓഫീസിനു മുൻപിൽ ഒറ്റയാൾ സമരം നടത്തും.

എബ്രഹാം ചെങ്ങറ

(റോഡ് വികസന സമിതി കൺവീനർ)