കുന്നത്തൂർ: മഴയ്ക്കൊപ്പം ആഞ്ഞു വീശിയ കാറ്റിൽ കുന്നത്തൂരിൽ വീടിന്റെ മേൽക്കൂര പറന്നു പോയി. കുന്നത്തൂർ കിഴക്ക് കടയിലഴികത്ത് വീട്ടിൽ സുരേഷിന്റെ ഇരുനില വീടിന്റെ മേൽക്കൂരയാണ് കാറ്റിൽ പറന്ന് അയൽ വീടിന്റെ മുറ്റത്ത് പതിച്ചത്. ആസ്ബസ്റ്റോസ് ഷീറ്റു കൊണ്ടാണ് മേൽക്കൂര നിർമ്മിച്ചിരുന്നത്. ആംഗ്ലേയറുകളും ഇതിൽ സ്ഥാപിച്ചിരുന്ന സീലിംഗ് ഫാനുകളും ഷീറ്റിനൊപ്പം പറന്ന് നിലം പതിച്ചു. മഴ വെള്ളം മുറികളിലേക്ക് പെയ്തിറങ്ങിയതിനാൽ കട്ടിലും മെത്തയും മറ്റ് ഫർണിച്ചറുകളും ഉപയോഗ ശൂന്യമായി. ഇന്നലെ വൈകിട്ട് അഞ്ചോടെയായിരുന്നു സംഭവം. ഓട്ടോ ഡ്രൈവറായ സുരേഷിന്റെ വൃദ്ധരായ മാതാപിതാക്കളും മക്കളും മാത്രമായിരുന്നു ഈ സമയം വീട്ടിലുണ്ടായിരുന്നത്. ആർക്കും പരിക്കില്ല. കാറ്റ് കുന്നത്തൂർ മേഖലയിൽ വ്യാപകനാശം വിതച്ചു.പാതയോരത്തും വീട്ടുപുരയിടങ്ങളിലും നിന്ന മരങ്ങൾ കടപുഴകിയും ശിഖരങ്ങൾ ഒടിഞ്ഞുമാണ് നാശനഷ്ടം സംഭവിച്ചത്.കുന്നത്തൂർ പാലത്തിന് കിഴക്ക് വശത്തെ വളവിൽ കൂറ്റൻ മരശിഖരം റോഡിലേക്ക് പതിച്ചതിനാൽ ഇതു വഴിയുള്ള ഗതാഗതം മണിക്കൂറുകളോളം ഭാഗികമായി തടസപ്പെട്ടു.