പത്തനാപുരം : അപൂർവ രോഗം ബാധിച്ച ഏഴു വയസുകാരന്റെ ജീവൻ രക്ഷിക്കാനായി മൂല കോശ ദാതാവിനെ കണ്ടെത്താൻ ക്യാമ്പ് സംഘടിപ്പിച്ചു. അഞ്ചൽ സ്വദേശി ശ്രീനന്ദനാണ് (7) മജ്ജ സംബന്ധമായ അപൂർവ കാൻസർ രോഗം ബാധിച്ച് ചികിത്സയിലുള്ളത്. രക്ത മൂലകോശ ദാതാവിനെ ലഭിക്കാനുള്ള സാദ്ധ്യത പതിനായിരത്തിൽ ഒന്നു മുതൽ ഇരുപത് ലക്ഷത്തിൽ ഒന്നു വരെയാണ്. 18 മുതൽ 50 വയസുവരെ ആരോഗ്യമുള്ള നിരവധി പേർ പങ്കെടുത്തു. ജീവനം കാൻസർ സൊസൈറ്റിയുടെ നേത്യത്വത്തിൽ രാജ്യത്തെ സന്നദ്ധ രക്ത മൂലകോശ ദാതാക്കളുടെ സംഘടന ധാത്രിയുമായി ചേർന്ന് പത്തനാപുരത്ത് ഡോണർ രജിസ്ട്രേഷൻ ക്യാമ്പ് നടത്തി.

ബിജു തുണ്ടിലിന്റെ അദ്ധ്യക്ഷതയിൽ ചേർന്ന യോഗത്തിൽ ക്യാമ്പിന്റെ ഉദ്ഘാടനം കെ.ബി. ഗണേഷ് കുമാർ എം.എൽ.എ നിർവഹിച്ചു.

പ്രോഗ്രാം കോ-ഓഡിനേറ്റർ ജോജി മാത്യൂ ജോർജ് സ്വാഗതം ആശംസിച്ചു. ജീവനം ഭാരവാഹികളായ പി.ജി സന്തോഷ് കുമാർ, ജവഹർ ജനാർദ്ദ് , മുഹമ്മദ് മിർസാദ്, എ.എം. ആർ. ഹാജി, ഷെരീഫ്, ധാത്രി കോഓഡിനേറ്റർ ദീപു, ശ്രീനന്ദന്റെ പിതാവ് രഞ്ജിത്ത് എന്നിവർ സംസാരിച്ചു. പുനലൂർ , കൊട്ടാരക്കര തുടങ്ങിയ സ്ഥലങ്ങളിലും ക്യാമ്പ് സംഘടിപ്പിക്കുന്നുണ്ട് .