കൊല്ലം: മഹാത്മജിയുടെ ദർശനങ്ങൾ സാമൂഹിക നന്മയുടെ തത്വശാസ്ത്രമാണെന്നുംഅത് നീതി ശാസ്ത്രത്തിന്റെ അടിസ്ഥാനമായിരിക്കണമെന്നും മന്ത്രി കെ.എൻ. ബാലഗോപാൽ പറഞ്ഞു. ഗാന്ധിസത്തിൽ വിശ്വസിക്കുന്നവർ അന്ധമായ രാഷ്ട്രീയ വൈരാഗ്യം വിട്ട് ജനകീയ പ്രശ്നങ്ങളിൽ യോജി​ച്ചു നി​ൽക്കണമെന്നും അദ്ദേഹം പറഞ്ഞു. ഗാന്ധിസത്തിന്റെ കാലിക പ്രസക്തി സമകാലീന ഇന്ത്യയിൽ എന്ന വിഷയത്തിൽ മഹാത്മാഗാന്ധി​ പീസ് ഫൗണ്ടേഷൻ സംഘടി​പ്പി​ച്ച ചർച്ചയി​ൽ സംസാരി​ക്കുകയായി​രുന്നു അദ്ദേഹം.

അഭി​പ്രായം പറയുന്നവരെ കോൺ​ഗ്രസ് നേതാക്കൾക്ക് ഭയമാണെന്നും അവരെ ഒറ്റപ്പെടുത്താനാണ് ശ്രമമെന്നും മുൻ കേന്ദ്രമന്ത്രിയും കോൺഗ്രസ് നേതാവുമായ കെ.വി. തോമസ് പറഞ്ഞു. ചടങ്ങി​ൽ മുഖ്യപ്രഭാഷണം നടത്തുകയായി​രുന്നു അദ്ദേഹം. വികസന പ്രവർത്തനങ്ങളിൽ രാഷ്ട്രീയം മറന്ന് മുന്നോട്ടു പോകാൻ എല്ലാവരും തയ്യാറാവണം. ഇന്ത്യയിൽ എല്ലായിടത്തും കോൺഗ്രസ് പതാക പറപ്പിക്കാൻ പ്രവർത്തകരുണ്ട്.പക്ഷേ അവരെ നയിക്കാൻ കൂടുതൽ പ്രാപ്തിയും തന്റേടവുമുള്ള നേതൃത്വം അനി​വാര്യമാണെന്നും അദ്ദേഹം അഭി​പ്രായപ്പെട്ടു. ഫൗണ്ടേഷൻ സംസ്ഥാന ചെയർമാൻ എസ്.പ്രദീപ് കുമാർ അദ്ധ്യക്ഷത വഹിച്ചു. എ. അബ്ദുൾ നാസർ, ഫാ. ഡോ. ഒ. തോമസ്, ആർ.പ്രകാശൻ പിള്ള, സി. ഗോപകുമാർ, ഡോ. പത്മകുമാർ, ഗീതു ശിവരാജ് എന്നിവർ സംസാരി​ച്ചു.