പടിഞ്ഞാറേകല്ലട : സംസ്ഥാനപാതയായ ചവറ - അടൂർ റൂട്ടിൽ കാരാളി,​ തോപ്പിൽ മുക്കുകൾക്കിടയിലെ യാത്ര അത്യന്തം ദുഷ്ക്കരമാകുന്നു. ദിവസേന നൂറുകണക്കിന് വാഹനങ്ങൾ സഞ്ചരിക്കുന്ന ഈ വഴിയിലെ കുഴികളാണ് യാത്രക്കാർക്ക് വെല്ലുവിളിയാകുന്നത്.

കൊടുംവളവ് കൂടിയായ സ്ഥലത്തേയ്ക്ക് വേഗതയിലെത്തുന്ന വാഹനങ്ങൾ തൊട്ടുമുമ്പിലെ കുഴി കണ്ട് പെട്ടെന്ന് ബ്രേക്ക് ചെയ്യുമ്പോൾ എതിരെ വരുന്ന വാഹനവുമായി കൂട്ടിയിടിക്കുന്നത് പതിവാണ്. കൂടാതെ,​ മഴവെള്ളം കെട്ടിക്കിടക്കുന്നത് കാരണം കുഴിയറിയാതെ രാത്രിയിൽ വാഹനങ്ങൾ വന്നുവീഴുന്നതും നിത്യസംഭവമാണ്. ഇത് മാസങ്ങളായി തുടർന്നിട്ടും അധികൃതർക്ക് അറിഞ്ഞമട്ടില്ല എന്നതാണ് നാട്ടുകാരെ ചൊടിപ്പിക്കുന്ന കാര്യം.

അപകടകരമായ കുഴികൾ നികത്തി വാഹനാപകടം ഒഴിവാക്കാൻ അധികൃതർ നടപടി സ്വീകരിക്കണമെന്നതാണ് അവരുടെ ആവശ്യം.

......................................................................................

റോഡിൽ കുഴിയുണ്ടെന്ന യാതൊരു മുന്നറിയിപ്പും ഇവിടെ സ്ഥാപിച്ചിട്ടില്ല. റോഡ് അപകടം കുറയ്ക്കുന്നതിന്റെ ഭാഗമായി കുഴികൾ നികത്താനുള്ള നടപടി അധികൃതരുടെ ഭാഗത്തുനിന്ന് ഉണ്ടാകണം.

ടിബിൻ തോമസ്,

ഇടനേരം റസ്റ്റോറന്റ്,​

കാരാളി ജംഗ്ഷൻ.

രാത്രിയിൽ എതിരെ വരുന്ന വാഹനങ്ങൾ ലൈറ്റ് ഡിം ചെയ്യാത്തത് കാരണം ഡ്രൈവർമാർക്ക് കുഴികൾ കാണാൻ കഴിയാത്ത അവസ്ഥയുണ്ട്. എത്രയും വേഗം റോഡ് ഗതാഗത യോഗ്യമാക്കുകയാണ് വേണ്ടത്.

മുത്തിലീഫ്,​

മുല്ലമംഗലം സ്റ്റോഴ്സ്,​

കാരാളിമുക്ക്.