കൊടുങ്ങല്ലൂർ: വെയ്‌ലർ - സൈക്ലിംഗ് പര്യവേഷണങ്ങളുമായി ഇന്ത്യൻ നേവി മുസ്‌രിസിലെത്തുന്നു. ഏപ്രിൽ രണ്ടിന് മുസ്‌രിസ് കായലിൽ തിമിംഗല ബോട്ടിംഗും ഓഫ്‌ഷോർ സൈക്ലിംഗ് പര്യവേഷണവുമായാണ് നേവി പദ്ധതി പ്രദേശത്ത് എത്തുന്നത്.

നേരത്തെ ആസാദി കാ അമൃത് മഹോത്സവത്തിന്റെ ഭാഗമായും ഇന്ത്യൻ നേവി ഇത്തരത്തിലുള്ള പര്യവേഷണം മുസ്‌രിസിൽ നടത്തിയിരുന്നു. കൊച്ചി നേവൽ ബേസിൽ നിന്ന് ആരംഭിച്ച് മുസ്‌രിസ് പൈതൃക പദ്ധതി പ്രദേശത്ത് അവസാനിക്കുന്ന പര്യവേഷണങ്ങൾ ഇന്ത്യൻ നാവികസേനയിലെ ആദ്യ പരിശീലന സ്‌ക്വാഡ്രണാണ് നയിക്കുക.

ഇന്ന് വൈകീട്ട് 4.30ന് മുസ്‌രിസ് കോട്ടപ്പുറം ആംഫി തീയറ്ററിൽ നടക്കുന്ന പരിപാടി അഡ്വ. വി.ആർ. സുനിൽകുമാർ എം.എൽ.എ ഉദ്ഘാടനം ചെയ്യും. നാവികസേന ആദ്യ പരിശീലന സ്‌ക്വാഡ്രൺ സീനിയർ ഓഫീസർ ക്യാപ്ടൻ അഫ്താബ് അഹമ്മദ് ഖാൻ മുഖ്യാതിഥിയാകും.

നഗരസഭ ചെയർപേഴ്‌സൺ എം.യു. ഷിനിജ അദ്ധ്യക്ഷയാകും. വൈസ് ചെയർമാൻ കെ.ആർ. ജൈത്രൻ, സ്റ്റാൻഡിംഗ് കമ്മിറ്റി ചെയർപേഴ്‌സൺ എൽസി പോൾ, കൗൺസിലർമാരായ ടി.എസ്. സജീവൻ, ജോണി വി.എം, ഫ്രാൻസിസ് ബേക്കൺ, മുസ്‌രിസ് പൈതൃക പദ്ധതി മാനേജിംഗ് ഡയറക്ടർ പി.എം. നൗഷാദ്, മാർക്കറ്റിംഗ് മാനേജർ ഇബ്രാഹിം സബിൻ എന്നിവർ പങ്കെടുക്കും. ഉദ്ഘാടന ചടങ്ങുകൾക്ക് ശേഷം നാടൻ കലാകാരന്മാർ ചവിട്ടുനാടകം അവതരിപ്പിക്കും. കോട്ടപ്പുറം കോട്ടയിലേയ്ക്ക് സംഘം സന്ദർശനവും നടത്തും.